महिला लिग छनोट : समीक्षाको दुई गोलमा कोशीको लगातार दोस्रो जित

१० बैशाख, काठमाडौं । समीक्षा मगरले दुई गोल गरेपछि कोशी प्रदेशले एन्फा महिला लिग छनोटमा सोमबार सुदूरपश्चिम प्रदेशलाई २-१ ले पराजित गरेको छ ।

प्रतियोगितामा कोशीको यो लगातार दोस्रो जित हो ।

सुर्खेतको वीरेन्द्रनगरस्थित कर्णाली स्टेडियममा भएको खेलमा समीक्षाले खेलको नवौँ मिनेटमा पहिलो गोल गरिन् भने पहिलो हाफको इन्जुरी टाइममा व्यक्तिगत दोस्रो गोल थपिन् ।

सुदूरपश्चिमका लागि यशोदा चिरालले ४९औं मिनेटमा गोल गर्दै गोल अन्तर कम पारेकी थिइन् । तर त्यसपछि थप गोल नहुँदा कोशीले जित हात पार्‍यो ।

पहिलो खेलमा कर्णाली प्रदेशलाई ३–० ले पराजित गरेको कोशीले लगातार दुई जितपछि ६ अंक जोडेको छ । पहिलो खेलमा गण्डकी प्रदेशलाई ५–१ ले हराएको सुदूरपश्चिमको यो पहिलो हार हो ।

– यस समाचारको श्रोत : Online Khabar हो ।