मार्दी हिमालमा हिउँसँग रमाइन् कोरियाली सुपरस्टार ली सि-यङ (तस्वीर)

काठमाडौं । चर्चित दक्षिण कोरियाली अभिनेत्री ली सि–यङ हालै आफ्ना ६ वर्षीय छोरासँग नेपाल घुम्न आएकी थिइन् । केही साता लामो बसाइमा उनले पोखरा घुमघामका साथै मार्दी हिमाल क्षेत्रको पदयात्रा समेत गरिन् ।

उनले नेपाल भ्रमणका तस्वीर र भिडियो सामाजिक सञ्जालमा सेयर गरेकी छन् । उनको नेपालको घुमघामलाई प्रमुख दक्षिण कोरियाली सञ्चारमाध्यमले स्थान दिएका छन् । उनले छोरालाई काँधमा बोकेर मार्दी हिमालमा हिउँसँग रमाएको र पदयात्रामा निस्किएको देख्न सकिन्छ ।

‘हामीले योजना अनुसार सूर्योदयको दृश्य भने हेर्न पाएनौं । बिहान ३ बजे नै हामी तयार भएर चाँडै पुग्ने कोसिस भएपनि सकिएन । यद्यपि, कसैलाई पछाडि नछोडीकन हामी ४२०० मिटर उचाइको मार्दी हिमालको भ्यु प्वाइन्टमा पुग्यौं’, ली सि-यङले लेखेकी छन्, ‘हामी पदयात्रा गरिरहञ्जेल मौसम खराब रह्यो ।’ नोभेम्बर १० मा लीले आफ्ना प्रशंसकलाई सुरक्षित रूपमा आफ्नो पदयात्रा पूरा गरेको जानकारी दिइन् ।

‘हामीले पोखराको एउटा होटलमा दुई दिन रमाइलो गरी बितायौं । पहाडमा बसेपछि सबै कुरा अनमोल लाग्छ न्यानो पानी, स्वादिष्ट खाना, आरामदायी ओछ्यान । सबैभन्दा धेरै, मेरो छोरा जंग–युन । धेरै खुसी थिए, खेल्दै, आराम गर्दै र प्याराग्लाइडिङ प्रयास गर्दै पनि’, उनले लेखेकी छन् ।

तस्वीरहरु

– यस समाचारको श्रोत : Online Khabar हो ।