यू-१९ महिला टी-२० विश्वकप छनोट : महिला क्रिकेटको रुपान्तरण लक्ष्य

२१ कात्तिक, काठमाडौं । युएईमा बुधबारदेखि आईसीसी यू १९ महिला टी २० विश्वकप एसिया छनोट सुरु हुँदैछ । नेपालले बुधबार थाइल्याण्डसँग खेल्दै छनोट यात्रा सुरु गर्नेछ । खेल नेपाली समय अनुसार दिउँसो सवा ३ बजे हुने छ ।

प्रतियोगिताका लागि दिल्लीमा प्रशिक्षण र केही अभ्यास खेलपछि नेपाली युवा टोली सोमबार दुबई पुगेको छ । दाङमा करिब दुई महिना प्रशिक्षण पछि नेपाली टोलीले दिल्लीमा समेत तयारी गरेको थियो । त्यतैबाट टोली युएई गएको हो ।

नेपाली टोलीले राम्रो तयारी गरेको र प्रतियोगिताको लागि तयार रहेको नेपाल यू १९ टिमका मुख्य प्रशिक्षक महेश प्रसाद रिजालले बताए । ‘हाम्रो तयारी राम्रो छ । हामीले पहिलो फेजमा फिटनेस र फिल्डिङमा निक्कै मेहनत गरेका थियौ । दोस्रो फेजमा ब्याटिङ, बलिङ र म्याच सिचुएसनमा केन्द्रित रहेर अभ्यास गरेका थियौ, दुबईबाट अनलाइनखबरसँगको कुराकानीमा प्रशिक्षक रिजालले भने, ‘दिल्लीको अभ्यास खेलले हामीलाई धेरै कुरा सिकाएको छ र यसले हामीलाई अहिले र हाम्रा खेलाडीहरुलाई पछि सम्म पनि निक्कै मद्दत गर्ने छ । त्यहाँको अभ्यास खेल हाम्रा लागि यो प्रतियोगितामा राम्रो प्रदर्शनका लागि आधार साबित हुनेछ ।’

एसिया छनोट प्रतियोगितामा नेपाल र आयोजक युएईसहित चार टोलीले प्रतिस्पर्धा गर्नेछन् । छनोट खेल्ने अन्य दई टोलीमा थाइल्याण्ड र कुवेत छन् । चार टोलबीच डबल राउण्ड रोविन आधारमा खेलहरु हुनेछ । हरेक टोलीले अर्को टोलीसँग २-२ खेल खेल्नेछन् । डबल राउण्ड रोविनको खेलहरु पछि धेरै अंक जोड्दै विजेता बन्ने एक टिम अर्को वर्ष मलेसियामा हुने आईसीसी यू १९ महिला टी २० विश्वकपका लागि छनोट हुनेछ ।

विश्वकप खेल्ने १६ टोलीमध्ये १५ टोलीको टुङ्गो लागिसकेको छ । जसमा अघिल्लो संस्करणका शीर्ष १० टोली, आयोजक मलेसिया अनी क्षेत्रीय छनोट जितेका नाइजेरिया, सामोअ, स्कटल्याण्ड र अमेरिका छन् । अमेरिका क्षेत्रमा भने अन्य कुनै टिम नभएकाले अमेरिका छनोट नखेली स्वत: विश्वकप खेल्न छानिएको हो ।

अघिल्लो पटक एसिया छनोटमा तेस्रो भएपछि नेपालले यू १९ विश्वकप खेल्न पाएन । पुरुष टोलीले यू १९ विश्वकप खेलेपनि महिला टोलीले भने अहिलेसम्म खेलेको छैन । यसपटक नेपाली टोली त्यो लक्ष्य पूरा गर्न चाहन्छ । यस पटक राम्रो तयारी गरेको नेपालले नतिजा पनि राम्रो नै आश गरेको छ । मुख्य प्रशिक्षक रिजालले राम्रो प्रदर्शन गर्दै नतिजा निकाल्ने बताए । ‘हाम्रो लक्ष्य राम्रो क्रिकेट खेल्दै हाम्रो महिला क्रिकेटको रुपान्तरणका लागि आधार तयार गर्नु नै हो,’ उनले भने , ‘नेपालमा गरिएको अभ्यास र दिल्लीको अभ्यास खेलले गर्दा हाम्रो सबै पक्षमा राम्रो सुधार आएको अवस्था छ । अब यसलाई हामीले प्रतियोगितामा निरन्तरता दिने छौं ।’

यसअघि पनि नेपालले रिजालकै प्रशिक्षणमा यू १९ महिला विश्वकप छनोट प्रतियोगिता खेलेको थियो । उनी दोस्रो पटक युवा टोली सम्हालिरहेका छन् । त्यसैले उनका लागि पनि यो प्रतियोगिता महत्वपूर्ण हुनेछ । ‘प्रमुख प्रशिक्षकको रुपमा मेरो यो दोस्रो एसाइन्मेन्ट हो । नेपाल क्रिकेट संघले म माथि देखाएको विश्वासलाई मैले सही साबित गर्नु पर्ने छ नै । यस प्रतियोगिताले हाम्रो महिला क्रिकेटको रुपान्तरणको आधार तयार गर्ने कुरामा म विश्वस्त छु ।’

यसअघि सन् २०२७ मा हुने यू १९ महिला टी २० विश्वकप नेपालले पनि बंगलादेशसँग मिलेर आयोजना गर्दैछ । घरेलु मैदानमा हुने त्यस विश्वकपका लागि पनि अहिलेदेखि नै खेलाडी तयार पार्नको लागि यस पटक विश्वकपमा पुग्न सकेन ठूलो प्रेरणा मिल्नेछ । प्रशिक्षक रिजालले पनि खेलाडीहरुले यसको महत्व बुझेको बताए । ‘यो प्रतियोगिताको महत्व हाम्रा खेलाडीहरुले पनि राम्ररी बुझेको छन् र यो प्रतियोगितालाई लिएर निक्कै उत्साहित छन् ।’

छनोट प्रतियोगितामा हरेक खेल नै चुनौतीपूर्ण हुने र त्यसलाई आत्मसाथ गरेर अघि बढ्ने प्रशिक्षक रिजालले बताए । ‘टी२० क्रिकेटमा स्वभाविक रुपमा चुनौती हुन्छ । हामीले हरेक खेललाई चुनौतीको रुपमा नै लिएका छौं,’ उनले भने ‘हामी आफू राम्रो क्रिकेट खेल्ने कुरामा केन्द्रित रहन्छौँ ।’

पुजा हुँदा फाइदा

नेपाली टोलीमा यसपटक अनुभव र युवा जोशको मिश्रण छ । राष्ट्रिय टिमबाट खेलिसकेकी पुजा महतोको कप्तानीमा १५ सदस्यीय नेपाली टोली मिश्रित बनेको छ । पुजाले नेपाली सिनियर टोलीबाट टी२० अन्तर्राष्ट्रिय खेल खेलेकी छन् ।

अलराउण्डर पुजा जसले सुरुमा राष्ट्रिय टिमबाट खेलेपछि उमेर समूहको नेतृत्व गर्दैछिन् । उनी सिनियर टिमको नियमित सदस्य नै हुन् । ‘पूजा हाम्रो टोलीको अनुभवी र क्रिकेटको राम्रो बुझाइ राख्ने राम्रो खेलाडी हुन्, प्रशिक्षक रिजालले भने, ‘उनी कप्तान रहँदा हाम्रो टोलीले यो सबै कुराको फाइदा प्राप्त गर्छ नै साथै उनीले आफ्नो खेलद्वारा पनि सम्पूर्ण टोलीलाई प्रेरित गर्न सक्नेछिन् ।’

यस्तै पुजा बाहेक राष्ट्रिय टिमबाट खेलिसकेकी सोनी पाख्रिन यू१९ टिमको उपकप्तान छन् । सोनीले नेपालको सिनियर टिमबाट दुई खेल खेलेकी छन् ।

अघिल्लो पटक यू१९ विश्वकप छनोट खेलेकी एलिसा यादव, साना प्रविन, स्नेहा महरा अहिले पनि टिममा छन् । राष्ट्रिय टिम र विश्वकप छनोटको अनुभवी लिएका यी खेलाडीहरुसहित अन्य नयाँ खेलाडीहरुको मिश्रण छ । यसले गर्दा पनि नेपाली टिम उत्साहित छ ।

नेपाली टोली यसपटक सन्तुलित रहेको र अलराउण्डरहरु रहेकाले राम्रो टिम बनेको प्रशिक्षक रिजालले बताए । ‘हाम्रो टोली यो फर्म्याटको लागि राम्रो छ । अलराउन्डरको उपस्थितिले दुवै पक्षलाई थप मजबुत दिएको छ ।’

नेपालको खेल तालिका

छनोटमा नेपालले कूल ६ खेल खेल्नेछ । नेपालले बुधबार थाइल्याण्डसँग खेल्दै छनोट यात्रा सुरु गर्नेछ । खेल नेपाली समय अनुसार दिउँसो सवा ३ बजे हुने छ । लिग चरणपछि नै विजेता टुङ्गो लाग्ने भएकोले हरेक खेल महत्वपूर्ण हुनेछ ।

नेपालले अघिल्लो पटक छनोटमा पनि युएई र थाइल्याण्डसँग खेलेको थियो । तर दुवै खेलमा नेपाल पराजित भएको थियो । युएईसँग ८ रनमै अलआउट हुँदै १० विकेटको हार व्यहोरेको नेपाल थाइल्याण्डसँग ४९ रनले पराजित भएको थियो ।

यस पटक नेपलालई त्यो हारको पीडा बिर्साउने र बदला लिने अवसर समेत हुनेछ ।

नेपाली टोली : पूजा महतो (कप्तान), सोनी पाख्रिन (उपकप्तान), एलिसा कुमारी यादव (विकेटकिपर), साना प्रविन, ज्योत्सनिका मरासिनी, कुसुम गोदार, सावित्रा धामी, कृश्मा गुरुङ, मनिषा उपाध्याय, रिया शर्मा, सिमाना केसी, स्नेहा महरा, रचना चौधरी, तृष्णा विक

फोटो : क्यान र राहुल शर्मा उपाध्याय

– यस समाचारको श्रोत : Online Khabar हो ।