रास्वपाका पदाधिकारीविरुद्ध अवहेलना निवेदन ‘दर्ता गर्न अस्वीकार’

२७ कात्तिक, काठमाडौं। राष्ट्रिय स्वतन्त्र पार्टीका केन्द्रिय पदाधिकारीहरु विरुद्ध पेश भएको ‘अदालतको अवेहलना’ निवेदन सर्वोच्च अदालत प्रशासनले दर्ता गर्न अस्वीकार गरेको छ ।

सर्वोच्च अदालतका सहरजिष्ट्रार अच्युत कुईकेलले ‘कहाँ कुन घटनाले कसरी अदालतको अवहेलना भएको हो ?’ भन्ने विवरण नखुलाइएको भन्दै रिट निवेदन दर्ता गर्न अस्वीकार(दरपीठ) गर्ने आदेश गरेका हुन् ।

सहकारी ठगीको आरोपमा रवि लामिछाने पक्राउ परेपछि रास्वपाका केन्द्रिय पदाधिकारीहरु सहितका कार्यकर्ताले पोखरामा प्रदर्शन गर्दै आइरहेका छन् ।

अदालतबाट म्याद थप गरी थुनामा राखिएको घटनामा सडक प्रदर्शन गरेर रास्वपाका केन्द्रिय पदाधिकारीहरुले अदालतको अवहेलना गरेको भन्दै अधिवक्ता अनुपम भट्टराईले सर्वोच्च अदालतमा अवहेलनाको निवेदन दर्ता गरेका थिए ।

सहरजिष्ट्रार कुइकेलले अवहेलनाजन्य कामवारे स्पष्ट खुलाउन नसकेको भन्दै निवेदन दरपीठ गरेको हो । दरपीठको आदेशमा भनिएको छ, ‘अदालतबाट भएको कुन आदेश, निर्णय वा फैसला को कसले के कसरी अवज्ञा गरी अदालतको अवहेलनाजन्य कार्य गरेको हो भनी स्पष्ट खुलाउन नसकेको हुँदा प्रस्तुत निवेदन दर्ता गर्न मिलेन ।’

अदालत प्रशासनको आदेश विरुद्ध अधिवक्ता भट्टराईले सर्वोच्च अदालतमै निवेदन दिन पाउछन् । एक न्यायाधीशको इजलासले सुनुवाई गर्ने निवेदन दर्ता गर्नु भन्ने आदेश भएमा सर्वोच्च अदालतमा रिट निवेदन दर्ता हुन्छ ।

– यस समाचारको श्रोत : Online Khabar हो ।