लेस्टरको प्रशिक्षकमा स्टिभ कुपर नियुक्त
६ असार, काठमाडौं । इंग्लिस क्लब लेस्टर सिटीले नटिङहम फरेस्टका पूर्वप्रशिक्षक स्टिभ कुपरलाई नयाँ प्रशिक्षक नियुक्त गरेको छ ।
लेस्टरले कुपरलाई तीन वर्षका लागि अनुबन्ध गरेको हो । ४४ वर्षीय कुपरले डिसेम्बर २०२३ मा फरेस्ट छाडेका थिए ।
एन्जो मारेस्का जुनको सुरुमै चेल्सी गएपछि लेस्टर प्रशिक्षकको खोजीमा थियो ।
मारेस्का गत सिजनको सुरुवातमा लेस्टरमा अनुबन्ध भएका थिए । उनले २०२२/२३ मा रेलिगेसनमा परेको लेस्टरलाई च्याम्पियनसिपको विजेता बनाउँदै तत्कालै प्रिमियर लिगमा बढुवा गराउन भूमिका खेलेका थिए ।
कुपरले लेस्टरमा अनुबन्ध भएपछि आफू उत्साहित रहेको प्रतिक्रिया दिएका छन् । ‘लेस्टरको फस्ट टिमको प्रशिक्षक नियुक्त हुँदा म एकदमै उत्साहित छु,’ कुपरले भने । कुपरले लेस्टरको इतिहास राम्रो रहेको र समर्थहरु पनि उत्कृष्ट रहेको बताए ।
– यस समाचारको श्रोत : Online Khabar हो ।