वरिष्ठ लोकगायक बस्नेतलाई दीर्घ साधना सम्मान प्रदान गरिने
काठमाडौं । दरबार रोधी क्लबले वरिष्ठ लोकगायक कुमार बस्नेतलाई लाइफटाइम अचिभमेन्ट अवार्डबाट सम्मानित गर्ने भएको छ । दरबारमार्गमा रहेको रोधीले १६ औं वार्षिकोत्सवको अवसरमा बस्नेतलाई भव्य समारोहकाबीच सम्मान गर्ने भएको हो ।
‘छोरी भन्दा आमा तरुनी’, ‘लैबरी लै’, ‘डल्ली मगर्नी हो’ जस्ता चर्चित लोकगीत गाएका ८१ वर्षिया बस्नेतले समाजका विकृति, विसङ्गती, कु-संस्कारलाई लोकगीतमार्फत जनतामा ल्याएको भन्दै सम्मानित गर्ने निर्णय गरिएको क्लबका अध्यक्ष अशोक गिरीले बताए ।
गिरीका अनुसार लोकदोहोरी गायनमा पुर्याएको योगदानको कदर गर्दै लोक गायक बद्री पंगेनी, सुनिता दुलाल र कृष्ण आँसुलाई पनि विशेष सम्मान प्रदान गरिनेछ । पत्रकारका तर्फबाट ऋषी धमलालाई विशेष सम्मान दिने निर्णय भएको छ ।
हरेक वर्ष आफ्नो वार्षिकोत्सवका अवसरमा सर्जकलाई सम्मान गर्दै आएको रोधीले यसपटकबाट कलाका क्षेत्रमा कलम चलाउने पाँच जना पत्रकारलाई समेत दरबार रोधी पत्रकारिता पुरुस्कारबाट पुरस्कृत गर्ने निर्णय गरेको हो ।
पत्रकारहरु विष्णु शर्मा, अन्वेषण अधिकारी, सुशिल नेपाल, नरेन्द्र रौले र आयशा दाहाललाई समेत पुरस्कृत गर्ने निर्णय क्लबले गरेको छ ।
क्लबले ३२ जेठदेखि असार २ गतेसम्म तीन दिन भव्यरुपमा वार्षिकोत्सव मनाउने निर्णय गरेको छ । शुक्रबार हुने उदघाटन समारोहमा संस्कृति, पर्यटन तथा नागरिक उड्डयनमन्त्री हितबहादुर तामाङ प्रमुख अतिथिको रुपमा सहभागि हुने जनाइएको छ ।
– यस समाचारको श्रोत : Online Khabar हो ।