विपनाको प्रश्न : विदेशी कलाकार नेपालमा आएर काम गर्दा किन विवाद ?
काठमाडौं । अभिनेत्री विपना थापा असोज ३ गते प्रदर्शन तयारीमा रहेको फिल्म ‘ह्रस्व–दीर्घ’बाट पुनरागमन गर्दैछिन् । विवाह गरेर भारत गएकी उनलाई दर्शकले लामो समयपछि हेर्न पाउँदैछन् ।
सयभन्दा बढी फिल्ममा अभिनय गरेकी बिपना कमब्याकलाई लिएर उत्साहित छिन् । तर, ‘ह्रस्व-दीर्घ’मा भारतीय कलाकार र प्राविधिक ल्याएको बारेमा कतिपयले आलोचना गरेपछि उनी असन्तुष्ट छिन् ।
केही नेपाली संचारमाध्यमसँग उनले आफ्नो असन्तुष्टि राखेकी छन् । नेपाली कलाकारले विदेशमा गएर काम गर्दा राम्रो हुने तर, विदेशी कलाकारले नेपालमा आएर काम गर्दा विवाद र आलोचना हुने भन्दै उनी असन्तुष्ट सुनिइन् ।
‘यो स्वार्थीपना भयो’ उनले भनिन्, ‘अहिले हरेक क्षेत्रमा गिभ एन्ड टेक हुनुपर्छ । यसलाई सकारात्मक ढंगले हेर्दा राम्रो ।’ आफूले धेरै वर्ष पहिले ‘रिमेम्बर मी’ नामक विदेशी फिल्म गर्दा नेपालबाट राम्रो सम्मान र प्रशंसा मिलेको स्मरण उनले गरिन् ।
‘भारतीय फिल्मबाट मलाई अफर आयो भने मैले नगर्ने कुरा हुँदैन’ उनले भनिन् ।
आफू विवाह गरेर भारतमा गएपनि आजसम्म पनि नेपाली नागरिकता र पासपोर्ट प्रयोग गर्ने गरिरहेको उनले बताइन् । नेपाली फिल्म पछिल्लो समय प्राविधिक पक्षमा धेरै प्रगति गरेको उनले बताइन् ।
अब नेपाली फिल्मको रोकिएको करिअरलाई निरन्तरता दिने उनको भनाई छ । ‘अब फिल्म करिअरलाई निरन्तरता दिने भनेरै नै फर्किएकी हुँ’ उनले भन्नि, ‘श्रीमानले काम सुरु गर भनेपछि फर्किन पनि सजिलो भयो ।’
– यस समाचारको श्रोत : Online Khabar हो ।