साविक विजेता रियल मड्रिड घरमै एसी मिलानसँग पराजित
२१ कात्तिक, काठमाडौं । युरोपियन च्याम्पियन्स लिगको डिफेन्डिङ च्याम्पियन रियल मड्रिड इटालियन क्लब एसी मिलानसँग घरेलु मैदानमै ३-१ ले पराजित गरेको छ ।
जारी सिजन च्याम्पियन्स लिगमा स्पानिस क्लब रियलको यो दोस्रो हार हो ।
सान्टियागो वर्नावेउमा भएको खेलको १२औं मिनेटमै मलिक थियोले गोल गर्दै मिलानलाई अग्रता दिलाएका थिए । तर, अग्रता लामो समय रहेन । २३औं मिनेटमा रियलका भिनिसियस जुनियरले पेनाल्टीमा गोल गर्दै खेल बराबरीमा ल्याए ।
३९औं मिनेटमा अल्भारो मोराटाले गोल गरेपछि मिलानले पहिलो हाफमा २-१ को अग्रता बनायो । दोस्रो हाफमा पनि मिलानले गोल थप्यो । ७३औं मिनेटमा तिजानी रेइन्डर्सले गोल गरेपछि मिलानले ३-१ को अग्रता बनायो ।
८१औं मिनेटमा रियलका एन्टोनियो रुडिगरले गोल गरेपनि भिएआरले मान्यता दिएन ।
च्याम्पियन्स लिगमा दोस्रो जितपछि ४ खेलबाट ६ अंक जोडेर मिलान १८औं स्थानमा उक्लिएको छ । दोस्रो हार बेहोरेको रियल समान ६ अंकसहित १७औं स्थानमा छ ।
– यस समाचारको श्रोत : Online Khabar हो ।