सिजनमै छैनन् पोखराका होटलमा पर्यटक, ल्याए छुट योजना

२३ असोज, पोखरा । पर्यटन क्षेत्रमा सिजन मानिने (सेप्टेम्बर– नोभेम्बर) महिनामै पोखराका अधिकांश होटल पाहुनाविहीन बनेका छन् । कोभिड माहामारीपछि पनि यही समयमा अघिल्लो वर्ष पर्यटकले भरिभराउ हुने होटलमा अहिले ४० प्रतिशत पाहुना छैनन् ।

पर्यटक सबैभन्दा धेरै आउने सिजनमै कोठाहरु खाली राख्नु परेपछि होटल संघ पोखराले ३० प्रतिशत छुट घोषणा गरेको छ । नेपालमा चाडबाडको मौसम र विदेशी पर्यटकका लागि पनि निकै उपयुक्त मानिने यो सिजनमै पाहुना नआएपछि पहिलोपटक छुट घोषणा गर्नुपरेको व्यवसायीहरु बताउँछन् ।

‘सेप्टेम्बर, अक्टोबर र नोभेम्बर सबैभन्दा धेरै पर्यटक आउने महिना मानिन्छ । कोभिडभन्दा अगाडिसम्म त पोखरामा ९९ प्रतिशतसम्म यो सिजनमा अकुपेन्सी थियो । कोभिडपछि पनि लयमा आइसकेको थियो,’ होटल संघ पोखराका अध्यक्ष लक्ष्मण सुवेदीले भने, ‘सबैभन्दा धेरै पर्यटक आउने पिन सिजनमै यसरी छुटको घोषणा गरेको यो पहिलो पटक हो ।’

पोखराका होटल व्यवसायीहरुले दशैं, तिहार र छठसम्मै ३० प्रतिशतसम्म छुट दिने घोषणा गरेका छन् । मंगलबारबाटै लागु हुने गरी पोखराका होटलमा खानबस्नका लागि ३० प्रतिशत छुट हुने होटल संघ पोखरका महासचिव राजेन्द्र ढकालले बताए ।

व्यवसायीहरुका अनुसार अघिल्ला वर्षहरुको अनुपात हेर्दा यो बेला ९० प्रतिशत हाराहारीमा अकुपेन्सी हुनुपर्ने हो । तर, पर्यटक नआउँदा ४० प्रतिशत पनि पुर्‍याउन नसकिएको होटल संघ गण्डकीका अध्यक्ष हरि शर्माले बताए ।

होटल संघ पोखरा अन्तर्गत करिब साढे ४ सय होटल छन् । ती होटलमा खान बस्नका लागि ३० प्रतिशत छुट दिन परिपत्र गरिसकेको र अन्य होटलमा पनि समन्वय भइरहेको संघका अध्यक्ष सुवेदीले जानकारी दिए ।

पर्यटक नआउनेमात्रै होइन, धमाधम बुकिङसमेत रद्ध गरिरहेको व्यवसायीको भनाइ छ । गत असोज १२ गतेको बाढी, पहिरो र डुबानले निम्त्याएको घटनापछि पोखरा आउने पर्यटकको संख्या  घट्न पुगेको हो । बाढी पहिरोका कारण धेरै मानिसको मृत्यु भएको, धेरै ठाउँमा सडकमा क्षति पुर्‍याएकोमात्रै होइन बस नै पुरेको र धेरैजसो सडकको हालत पनि खराब छ भन्ने सन्देश जाँदा धेरै पर्यटक नआएको व्यवसायीको भनाइ छ । बाढी, पहिरोको घटनापछि होटलका कोठा बुकिङ पनि रद्ध गरेको संघ पोखराका उपाध्यक्ष गणेश पहारीले बताए ।

गत भदौ २७ गते पृथ्वीराजमार्ग अन्तर्गत ऐना पहरामा भएको भारतीय बस दुर्घटना, अहिलेको बाढीपहिरोको क्षति र सडकको अवस्थाले धेरै पर्यटकले बुकिङ रद्ध गरेको संघका अध्यक्ष सुवेदीको भनाइ छ । ‘बस दुर्घटनापछि भारतीय पर्यटकको कमी भयो । केही दिन अगाडिमात्रै काठमाडौंमै जुन घटना घट्यो, त्यसका कारण धेरै गलत सन्देश गएको देखियो,’ अध्यक्ष सुवेदीले भने, ‘मौसमविदले हिले दशैं हुनसक्ने भनेकाले धेरै होटल व्यवसायीले बुकिङ रद्ध गरेको बताइरहेका छन् ।’

अब मनसुन बाहिरन थालेको र पोखरा सुरक्षित पनि रहेको सन्देश दिनुपर्ने उनको भनाइ छ । त्यसका लागि पनि छुट घोषणा गरिएको र कतिपय होटलहरुले प्याकेजको घोषणा पनि गरिरहेको अध्यक्ष सुवेदीले बताए । कतिपय पर्यटक पदयात्रामै रहेको र दशैं बिदासँगै नेपाली पर्यटक पनि आउन खोज्ने भएकाले संघले छुटको घोषणा पनि गरेर पाहुना बोलाउन लागिएको सुवेदीको भनाइ छ ।

चाडबाडसँगै पोखरामा अन्तर्राष्ट्रिय क्रस कन्ट्री दौड प्रतियोगिता, स्ट्रिट फेस्टिभल, हट एयर बेलुन फेस्टिभल लगायतका कार्यक्रमले पनि फेरि पर्यटकीय गतिविधि बढ्ने विश्वास सुवेदीको छ । दशैंको टीकालगत्तै ७० प्रतिशतसम्म पर्यटक आउन सक्ने उनको अनुमान छ ।

पोखराका होटलमा करिब ५ खर्ब लगानी भएको र करिब १५ हजार मजदूरले काम गर्ने अनुमान छ । पोखरामा होटलमा एकैपटक ४० हजार जनालाई राख्न सक्ने क्षमता रहेको बताइन्छ । तर, संघमा आबद्ध नभएका पनि साना–ठूला थुप्रै होटलहरु सञ्चालनमा छन् ।

लेकसाइड क्षेत्रमा मात्रै १ हजार होटल हुन सक्ने अनुमान छ । कम पर्यटक आउँदा धेरै होटलबीच प्रतिस्पर्धा गर्नुपर्ने, पर्यटक तानातान गर्नेसम्मको घटना पनि हुने गरेको छ । पर्यटकस्तरका होटलमा अनलाइनमार्फत बुकिङ गरेर आउने भएकाले धेरै समस्या देखिँदैन । तर, त्यसबाहेकका होटललाई पनि स्तरीय सेवा दिएर चलाउन विभिन्न समयमा आग्रह तथा समन्वय गर्ने काम पनि आफूहरुले गरेको होटल संघ पोखराका अध्यक्ष सुवेदीको भनाइ छ ।

– यस समाचारको श्रोत : Online Khabar हो ।