सोलुखुम्बुमा आगलागीले २२ घरगोठ जले
२० वैशाख, सोलुखुम्बु । सोलुखुम्बुमा जङ्गलको डढेलो गाउँमा सल्किंदा १० घर जलेर नष्ट भएका छन् ।
आगोले १२ वटा गोठ जल्नुका साथै केही पशुचौपाया नष्ट भएको जिल्ला प्रहरी कार्यालय सोलुखुम्बुले जनाएको छ ।
थुलुङ दूधकोशी गाउँपालिका–३ पञ्चनमा बुधबार भएको आगलागीबाट बुद्धिमाया चर्मकार, पूर्णबहादुर अधिकारी, कालीबहादुर अधिकारी, हस्तिमाया राई र पारसमणि राईको घरगोठ जलेर नष्ट भएको जिल्ला प्रहरी कार्यालयका सूचना अधिकारी प्रहरी निरीक्षक रामचन्द्र साहले जानकारी दिए ।
यस्तै बडीसुवा राई, उत्तरकुमार राई, दिलबहादुर राई, निशान राई र टीकाध्वज राईको घर पनि आगोले जलेको प्रहरी निरीक्षक साहले बताए ।
उनले भने, ‘वनमा फैलिएको डढेलो निभाउन प्रहरीसहित स्थानीय जनशक्ति सक्रिय थिए, एक्कासी आगो गाउँमा सल्कियो र केही घरगोठ जले ।’
गाउँमा सल्किएको आगो नेपाल प्रहरी, सशस्त्र प्रहरी, स्थानीयबासी, लगायतको सक्रियतामा नियन्त्रणमा लिइएको साहले बताए । क्षतिको विवरण संकलन भइरहेको उनले बताए ।
– यस समाचारको श्रोत : Online Khabar हो ।