५ वर्षपछि ‘हल्का रमाइलो’बाट सिरियलमा फर्किए बान्द्रे

काठमाडौं । कुनैबेला टिभी सिरियल ‘मेरी बास्सै’मा बान्द्रे पात्रको भूमिकामा चर्चित थिए सुरज चापागाईं । त्यो सिरियलमा उनी माग्ने बूढा (केदार घिमिरे)को सालोको रोलमा थिए ।

त्यसयता कोभिड महामारी सुरु भयो । सिरियलकर्म प्रभावित बन्यो र उनी अभिनयबाट टाढिए । पाँच वर्षपछि दर्शकले आफ्नो प्रिय पात्र बान्द्रेलाई सानो पर्दामा हेर्न पाएका छन् ।

बल्छी धुर्वे (मरिचमान श्रेष्ठ)ले निर्देशन गरिरहेको सिरियल ‘हल्का रमाइलो’को गत साताको एपिसोडबाट बान्द्रेको कमब्याक भएको छ । बान्द्रे र बल्छी धुर्वे कुनैबेला ‘मेरी बास्सै’का चर्चित कलाकार हुन् ।

‘हल्का रमाइलो’मा सात वर्षपछि यी दुईको सहकार्य पनि भएको छ । निर्देशक समेत रहेका बल्छी धुर्वेले बान्द्रेलाई पैसा कमाएर विदेशबाट फर्किएको रोलमा प्रस्तुत गरिएको बताए । पछिल्लो एपिसोडमा उनको विवाह गरेको देखाइएको छ ।



यो एपिसोडमा बान्द्रेको विवाहमा जन्ती जान लागेको बल्छी धुर्वेसँग कोट नभएको समस्या देखाइएको छ । त्यसपछि कोटजस्तै देखिने रङ शरीरमा पोतेर उनले व्यंग्य गरेका छन् । शरीरमा रङ दलिएको यो हुलिया यतिबेला सामाजिक सञ्जालमा भाइरल बनेको छ ।

अबदेखि बान्द्रेले नियमितरुपमा ‘हल्का रमाइलो’मा अभिनय गर्ने बल्छी धुर्वेले बताए । ‘उहाँ अब नियमितरुपमा सिरियल खेल्नुहुन्छ,’ उनले भने । कोभिडपछि बान्द्रे आफूले बनाएको ‘मेरो स्कुल’ नामक फिल्मलाई विद्यालयमा प्रदर्शन गर्न व्यस्त थिए ।

– यस समाचारको श्रोत : Online Khabar हो ।