युरो २०२४ आज देखि, आयोजक जर्मनीले स्कटल्याण्डसँग खेल्ने

३२ जेठ, काठमाडौं । मिनी विश्वकप भनिने युरोकप फुटबल प्रतियोगिताको १७औं संस्करण आजदेखि सुरु हुँदैछ । पहिलो खेलमा आयोजक जर्मनीले स्कटल्याण्डसँग खेल्दैछ ।

खेल नेपाली समय अनुसार राति १२:४५ बजे म्युनिखस्थित एलिएन्ज एरेनामा सुरु हुनेछ । तीन पटकको विजेता जर्मनी घरेलु मैदानमा उपाधि जित्ने लक्ष्यमा छ । त्यसैले जर्मनी सुखद सुरुवात गर्ने लक्ष्यमा छ ।

जर्मनी र स्कटल्याण्ड मुख्य प्रतियोगितामा तेस्रो पटक भिड्न लागेका हुन् । यसअघि सन् १९८६ को फिफा विश्वकप र १९९२ को युरोमा जर्मनीले स्कटल्याण्डलाई पराजित गरेको थियो ।

पछिल्लो १३ खेलमा स्कटल्याण्डले एक पटक मात्र जर्मनीलाई हराएको छ । सन् १९९९ मा स्कटल्याण्डले जर्मनीलाई १-० ले पराजित गरेको थियो ।

जर्मनी आफ्नो इतिहासमा १४औं पटक युरो खेल्दैछ, जुन कीर्तिमान हो । यस्तै जर्मनीले स्पेनसँगै सर्वाधिक ३ पटक युरोकप जितेको छ । यस पटक घरेलु मैदानमा उपाधि जित्दै युरोमा सफल टोली बन्ने योजनामा छ ।

जुन १४ देखि जुलाई १४ सम्म जर्मनीका विभिन्न १० शहरको १० स्टेडियममा हुने प्रतिस्पर्धामा युरोपका २४ उत्कृष्ट राष्ट्रको सहभागिता छ ।

अघिल्लो संस्करण युरोपकको विभिन्न ११ देशको ११ शहरमा आयोजना भएको थियो । तर यस पटक फेरि युरोकप एकै देशमा मात्र आयोजना हुँदैछ ।

यस्तै प्रतियोगिताको फाइनल जुलाई १४ मा बर्लिनस्थित ओलम्पिक स्टेडियममा हुनेछ ।

जर्जियाले ड्ब्यु गर्दै

२०२० को युरो खेलेका च्याम्पियन इटलीसहित १९ टिमले यस पटक पनि युरो खेल्दैछन् । जर्जियाले नयाँ टिमको रुपमा युरोकपमा डेब्यु गर्दैछ भने अल्वानिया, स्लोभेनिया, सर्विया र रोमानियाले पनि पुनरागमन गरेका छन् ।

यस पटक छनोट हुन नसकेका ठूला टिममा स्वीडेन, रुस र वेल्स हुन् । यस्तै एर्लिन हालान्ड र मार्टिन ओडेगार्ड जस्टा स्टार भएको नर्वे पनि छनोट हुन सकेन ।

जर्मनी र स्पेनले अहिलेसम्म सर्वाधिक ३-३ पटक युरो जितेका छन् । यस पटक यी दुई मध्ये कुनै एकले उपाधि जितेमा सर्वाधिक ४ पटक च्याम्पियन हुनेछ ।

अघिल्लो संस्करण जस्तै यस पटक पनि युरोमा २४ राष्ट्रको सहभागिता रहनेछ । सहभागी २४ टिमलाई ६ समूहमा विभाजन गरेर खेलाइनेछ । हरेक समूहमा ४-४ टिम छन् ।

प्रतियोगिता लिग कम नकआउट शैलीमा खेलाइनेछ । समूह चरणमा ६ समूहको गरी कूल ३६ खेल हुनेछन् । हरेक समूहको शीर्ष दुई टोली सिधै अन्तिम १६ मा प्रवेश गर्नेछन् । यस्तै तेस्रो हुने ६ मध्ये उत्कृष्ट ४ टोलीले पनि अन्तिम १६ मा स्थान बनाउनेछन् । अन्तिम १६ देखि फाइनलसम्म नकआउट चरणमा १५ खेल हुनेछ र युरोमा कूल ५१ खेल हुनेछ ।

युरो २०२४ समूह विभाजन

समूह ए : जर्मनी, स्कटल्याण्ड, हंगेरी, स्वीट्जरल्याण्ड

समूह बी : स्पेन, क्रोएसिया, इटली, अल्वानिया

समूह सी : इंग्ल्याण्ड, डेनमार्क, सर्विया, स्लोभेनिया

समूह डी : फ्रान्स, नेदरल्याण्ड्स, पोल्याण्ड, अष्ट्रिया

समूह ई : बेल्जियम, स्लोभाकिया, रोमानिया, युक्रेन

समूह एफ : पोर्चुगल, टर्की, चेक रिपब्लिक, जर्जिया

– यस समाचारको श्रोत : Online Khabar हो ।