गर्भावस्थाको दोस्रो महिनामा के-कस्तो परिवर्तन देखिन्छ ?

गर्भावस्थाको दोस्रो महिना गर्भवती महिलाले नौलो अनुभव गर्छिन् । नयाँ आमा बन्ने ९ महिने यात्राको हरेक पल नै विशेष लाग्न थाल्छ । जति गर्भावस्था अघि बढ्छ महिलामा शारीरिक र मानसिक परिवर्तन पनि उत्तिकै देखिन्छ ।

दोस्रो महिनामा पनि पहिलो महिनाको जस्तो लक्षण तर कम देखिन्छ । लक्षणमा तलमाथि भए पनि पेटको आकारप्रकारमा भने खास कुनै परिवर्तन आउँदैन । स्तन भने तुलनात्मक रुपमा भरिएको जस्तो महसुस हुन्छ ।

लक्षण

– बिहान वाकवाक लाग्नु

– स्तन कोमल र आकारप्रकारमा वृद्धि हुनु

– रक्तप्रवाहमा वृद्धि हुनु

– हर्मोनल परिवर्तन हुनु

– मुड परिवर्तन (अनि उत्सुक, सानो कुराले दुखी वा भावुक हुने वा सानो कुरामा रिसाउने) हुनु

– कुनै खानेकुराको तीव्र इच्छा हुने र कुनै खाने कुरा हेर्न पनि मन नलाग्ने हुनु

– पाचनतन्त्र प्रभावित हुनु

– पिसाब पटक-पटक आउनु

– गर्भाशय हल्का फैलिनु

गर्भवती महिलाले अनुभव गर्ने लक्षणमा केही तलमाथि पनि हुनसक्छ । कुनै चिन्ता वा अन्योलमा परे चिकित्सकको परामर्श लिन ढिला गर्नु हुँदैन ।

बच्चाको विकास कति हुन्छ ?

– दोस्रो महिनामा गर्भमा रहेको बच्चाको नाक, मुख र कानको थोरै विकास हुन्छ । आँखाको ढकनीले रुपरेखा लिन थाल्छ । केही महत्वपूर्ण अंगको बिस्तारै विकास हुन्छ । जस्तै- सानोको फोक्सो श्वासप्रश्वासको नलीसँग घाँटीमा गएर जोडिन्छ । मुटु १०५ बिट धड्किरहेको हुन्छ ।

यो महिनामा बच्चाको आकार आधा इन्च लामो हुन्छ ।

स्वास्थ्य परीक्षण सूची

– चिकित्सकसँग अपोइन्टमेन्ट लिने वा बोलाएमा जाने

– चिकित्सकलाई भेटेर बच्चाको स्वास्थ्यबारे सुनिश्चित गर्ने

– परीक्षणमा अल्ट्रासाउण्ड, मूत्र परीक्षण, नियमित रगत जाँच र अनुवांशिक जाँचका लागि चिकित्सकले आवश्यक परे सिफारिस गर्न पनि सक्छन् ।

के–के जाँच हुनसक्छ ?

अल्ट्रासाउण्ड : गर्भावस्थाको अन्तिम समय पत्ता लगाउन र बच्चा एउटा वा जुम्ल्याहा छ भनेर हेर्न परीक्षण गर्न गरिन्छ ।

नियमित रगत परीक्षण : रगतको प्रकार, आरएच कारकको परीक्षण, रक्तअल्पता र संक्रमणको सम्भावना हेर्न यो परीक्षण गरिन्छ ।

पिसाब परीक्षण : मूत्रनलीमा संक्रमण वा अन्य असमान्य परीक्षणका लागि हुनसक्छ ।

चिकित्सकले सुझाएको फोलिक एसिड  खाने । यसले बच्चाको मस्तिष्क र मेरुदण्डमा हुनसक्ने समस्या आउन दिंदैन ।

दोस्रो महिनामा व्यायाम

गर्भावस्थाको दोस्रो महिनामा हल्का खालका व्यायाम गर्नु उपयुक्त हुन्छ ।

– घर वरपर घुमफिर गर्न सकिन्छ ।

– योग प्रशिक्षकको सहायतामा र चिकित्सकको सल्लाहमा योग गर्न सकिन्छ ।

– दैनिक क्रियाकलाप गर्न सकिन्छ । तर भारी काम भने गर्न हुँदैन ।

सावधानी

– धुम्रपान, मदिरा र लागूपदार्थ सेवन पटक्कै नगर्ने

– भारी काम नगर्ने

– केही समस्या भए चिकित्सकलाई भेट्ने

– नियमित परामर्शका लागि चिकित्सकलाई भेट्ने

– क्याफिनयुक्त खानेकुरा कम खाने

– विना परामर्श औषधि नलिने ।

– यस समाचारको श्रोत : Online Khabar हो ।