ब्रोकर कमिसन घट्यो, यस्तो छ सेयर कारोबारमा लाग्ने नयाँ कमिसन दर

१ जेठ, काठमाडौं । आज मंगलबारदेखि धितोपत्र कारोबारमा लाग्ने ब्रोकर कमिसन घटेको छ । मंगलबारदेखि हुने सबै कारोबारमा घटेको ब्रोकर कमिसन लागू हुने सीडीएस एण्ड क्लियरिङका सीईओ पूर्णप्रसाद आचार्यले जानकारी दिए ।

‘आजदेखि कार्यान्वयन हुनेगरी सिस्टममा नयाँ कमिसन दर सेट गरी परीक्षण पनि गरिसकेका छौं’ उनले भने । विद्यमान कायम ब्रोकर कमिसनमा १० प्रतिशत घटाइएको छ ।

अब सेयर कारोबारमा लगानीकर्ताले अधिकतम ०.३६ प्रतिशत ब्रोकर कमिसन तिर्नेछन् । यसअघि ०.४० प्रतिशत थियो । यस्तै ब्रोकर कमिसनको तल्लो सीमा ०.२४३ प्रतिशतमा झरेको छ ।

प्रतिकारोबार रकमका आधारमा ब्रोकर कमिसन लाग्दै आएको छ । ५० हजार रुपैयाँसम्मको कारोबारमा हाल ०.४० प्रतिशत ब्रोकर कमिसन लाग्दै आएको छ । त्यस्तै ५० हजारदेखि ५ लाख रुपैयाँसम्मको कारोबारमा ०.३७ प्रतिशत, ५ लाखदेखि २० लाखसम्मको कारोबारमा ०.३४ प्रतिशत, २० लाखदेखि १ करोडसम्मको कारोबारमा ०.३० र १ करोडमाथिको कारोबारमा ०.२७ प्रतिशत ब्रोकर कमिसन लाग्दै आएको छ ।

कारोबार रकममा ब्रोकरको नयाँ कमिसन दर :

कारोबार रकम
नयाँ ब्रोकर कमिसन दर

५० हजारसम्म
०.३६%

५ लाखसम्म
०.३३%

२० लाखसम्म
०.३०%

१ करोडसम्म
०.२७%

१ करोडमाथि
०.२४३%

ब्रोकर कम्पनीहरुले आफूले पाउने कमिसनबाट नेपाल स्टक एक्स्चेन्जलाई २० प्रतिशत रकम छुट्टै बुझाउँदै आएका छन् । ब्रोकर कम्पनीहरुको कमिसन घटेसँगै नेप्सेले पाउने कमिसन पनि स्वतः घट्ने भएको छ ।

ब्रोकर कम्पनीहरु भने पटक पटक कमिसन घटाउँदै गएपछि कार्यालयको सञ्चालन खर्च धान्न धौधौ परेको बताउँछन् । स्टक ब्रोकर एसोसिएसन अफ नेपालका अध्यक्ष धर्मराज सापकोटा ब्रोकर कम्पनीहरुको सञ्चालन दीगो बनाउनेगरी कामको दायरा बढाउनेगरी नियामकले सोच्नुपर्ने बेला आएको बताए ।

– यस समाचारको श्रोत : Online Khabar हो ।