नेसन्स लिगमा स्वीडेनको फराकिलो जित, जर्मनी बराबरीमा रोकियो
५ मंसिर, काठमाडौं । यूईएफए नेसन्स लिग फुटबलअन्तर्गत मंगलबार राति भएको खेलमा स्वीडेनले फराकिलो जित निकालेको छ । लिग सी समूह १ अन्तर्गतको खेलमा स्वीडेनले अजरबैजानमाथि ६-० को फराकिलो अन्तरले जित निकालेको हो ।
स्वीडेनको जितमा भिक्टोर ग्योकेरेसले ह्याट्रिकसहित ४ गोल गरे भने डेजान कुलुसेभ्सकीले २ गोल गरे । स्वीडेनले दुवै हाफमा ३-३ गोल गरेको थियो ।
१०औं मिनेटमा कुलुसेभ्सकीले गोल गर्दै स्वीडेनलाई सुरुआती अग्रता दिलाएका थिए । २६औं मिनेटमा ग्योकेरेसले गोल गर्दै टोलीको अग्रता दोब्बर पारे । ३७औं मिनेटमा ग्योकेरेसले व्यक्तिगत दोस्रो गोल गरेपछि स्वीडेनले पहिलो हाफमा ३-० को अग्रता बनायो ।
दोस्रो हाफको ५७औं मिनेटमा कुलुसेभ्सकीले व्यक्तिगत दोस्रो गोल गरे भने त्यसको एक मिनेटपछि ग्योकेरेसले ह्याट्रिक पूरा गर्दा स्वीडेनको अग्रता ५-० भयो ।
७०औं मिनेटमा ग्योकेरेसले चौथो गोल गर्दै टिमको आधा दर्जन गोल पुर्याए । यस जितसँगै स्वीडेनको ६ खेलमा १६ अंक भएको छ भने क्वाटरफाइनलमा यसअघि नै स्थान बनाइसकेको थियो ।
जर्मनी र हंगेरीको बराबरी
नेसन्स लिगकै लिग ए समूह ३ अन्तर्गतको खेलमा जर्मनी बराबरीमा रोकिएको छ । जर्मनीलाई हंगेरीले १-१ को बराबरीमा रोकेको हो ।
खेलको ७६औं मिनेटमा फेलिक्स मेचाले गोल गर्दै जर्मनीलाई अग्रता दिलाएको भएपनि इन्जुरी समयको अन्त्यतिर पाएको पेनाल्टीमार्फत डोमिनिक सोबोस्लाईले गोल गर्दै हार टारेका हुन् ।
– यस समाचारको श्रोत : Online Khabar हो ।