पोखराका मेयर-उपमेयर नै विदेशमा, अमेरिकाबाट फर्केलगत्तै मोती बने कार्यबाहक

२० कात्तिक, पोखरा । पोखरा महानगरका मेयर र उपमेयर नै अहिले विदेश भ्रमणमा छन् ।

मेयर धनराज आचार्य संयुक्त राष्ट्र संघको मानव बसोबास कार्यक्रमले आयोजना गरेको ‘दिगो शहरी विकास र मानव बसोबास सम्बन्धी विश्वव्यापी छलफल’ कार्यक्रममा भाग लिन इजिप्टको कायरोमा छन् भने उपमेयर मञ्जुदेवी गुरुङ पारिवारिक भ्रमणमा साइप्रस छिन् ।

मेयर–उपमेयर नै विदेश भ्रमणमा हुँदा पोखरा महानगरको सेवा प्रवाह प्रभावित बन्न पुगेको छ भने कतिपय नेतृत्वले मिलाउनुपर्ने विषय पनि सुल्झन सकेको छैन । मेयर आचार्यले कार्यपालिकाको प्रवक्तासमेत रहेका वडा नम्बर २५ का अध्यक्ष मोतीलाल तिम्सिनालाई कार्यबाहक मेयरको जिम्मेवारी दिएका छन् ।

श्रीमती भेट्न अमेरिका गएका उनी डेढ महिना बसेर फर्किएपछि कार्यबाहक मेयरको जिम्मेवारी पाएका हुन् । ‘अमेरिकाबाट फर्किएलगत्तै कार्यवाहकको जिम्मेवारी मिल्यो, संयोग नै त्यस्तै पर्‍यो’, तिमिल्सिनाले भने, ‘कार्यालयमा उपस्थित नहुँदासम्मको लागि कार्यबाहक भन्नुभएको छ, अबको ४/५ दिनमा त उहाँका फर्किनुहुन्छ ।’

तिमिल्सना श्रीमतीलाई अमेरिका जाँदा मेयर आचार्य पनि अमेरिका भ्रमणमा गएका थिए । त्यो बेला मेयर र प्रवक्तासमेत रहेका तिमिल्सिनाले अमेरिकामै औपचारिक कार्यक्रममा सँगै सहभागिता जनाएका थिए । तिनै प्रवक्ता अमेरिकाबाट फर्केलगत्तै कार्यबाहक मेयर बनेका हुन् ।

मेयर आचार्य धेरै विदेश भ्रमण गर्ने स्थानीय जनप्रतिनिधि हुन् । उनले ११ औं पटक विदेश भ्रमण गरिसकेका छन् । मेयर आचार्य र उपमेयर गुरुङ दुबै जना नहुँदा पोखरा महानगरको करार कर्मचारीको विषय पनि थप अन्योल बनेको छ ।

१८ जना प्राविधिकलाई हटाउने निर्णय गरेपछि कर्मचारी आन्दोलित छन्, उनीहरुको आन्दोलनलाई नेकपा एमालेले समर्थन गरेको छ । एमाले समर्थित कर्मचारीको आन्दोलनका कारण सेवा नै प्रभावित बनेको छ तर नेतृत्व विदेश भ्रमणमा छन् ।

तिहार बिदा सुरु भइसकेपछि पोखरामा कात्तिक १५ गते १८ जना प्राविधिकलाई कात्तिकसम्मको सेवासुविधा दिएर हटाउने, ७ जना शिक्षिका र परिचालिकालाई कार्यालय सहयोगीमा झार्ने निर्णय भएको थियो । एमालेले त्यसको विरोध गर्दै कर्मचारीको आन्दोलनलाई समर्थन गरिरहेको छ ।

करार कर्मचारीलाई हाजिर गराएर काममा लगाउने तर उनीहरुको निर्णय गर्नुपर्ने बेला दशैंअगाडि पनि मेयर अमेरिका भ्रमणमा थिए । त्यो मेयर विदेश भ्रमणमा भएर छलफल हुन नसक्दा करारका कर्मचारीले तलबसमेत खान पाएका पाएनन् ।

पारिवारिक भ्रमणमा उपमेयर गुरुङ ९ कात्तिकमा साइप्रस गएकी हुन् ।

– यस समाचारको श्रोत : Online Khabar हो ।