भ्वाइस अफ नेपाल सिजन ६ : चारै कुर्सी घुमाइमा रेकर्ड

काठमाडौं । ‘भ्वाइस अफ नेपाल’को छैटौं सिजन रोचक हुने देखिएको छ । हिमालय टिभीले आउँदो संस्करण अहिलेसम्मकै रोमाञ्चक र भ्युअर्ससिपको हिसाबले पनि खास हुने जनाएको छ ।

मंसिर अन्त्यदेखि छैटौं सिजन प्रसारण हुने अपेक्षा गरिएको छ । यद्यपि यसबारे आधिकारिक मिति आइसकेको छैन । प्रसारण नहुँदै कोचको हेरफेर लगायतका कुराले छैटौं सिजन चर्चामा छ । यो चर्चाबीच शोलाई लिएर नयाँ खबर छ ।

नयाँ सिजनमा सर्वाधिक संख्यामा चारै कोचका कुर्सी घुमेका छन् । ६१ जनाको ब्लाइन्ड अडिसन लिंदा २५ जनाले चारै कोचको कुर्सी घुमाउन सफल भए । ‘भ्वाइस अफ नेपाल’को यात्रा सुरु भएयता यो रेकर्ड हो । ‘अहिलेसम्मकै उच्च संख्यामा चारै कुर्सी घुमेका छन्’ निर्देशक लक्ष्मण पौडेलले भने, ‘अब रियालिटी शोमा अब्बल गायक-गायिका पनि आउन थालेको संकेत हो ।’

 पाँचौं सिजनमा ९ जनाले मात्र चार कुर्सी घुमाउन सफल भएका थिए । भ्वाइसको विश्वव्यापी संरचना अनुसार प्रतिस्पर्धीको अडिसन मनपरे कोच घुम्नुपर्ने नियम छ । ‘चारै कुर्सी घुम्नुको अर्थ संगीतलाई गम्भीरतासँग लिएको बुझ्न सकिन्छ । राम्रा गायक-गायिका पनि भ्वाइसमा आएका छन् । यसपटक त्यो संख्या अझै वृद्धि हुने देखिन्छ’ पौडेलले भने ।

नयाँ सिजनमा मेलोडी जनराका कलाकार बढी आएका छन् । त्यसपछि रक गाउनेको संख्या धेरै छ । सबैभन्दा न्यून लोकदोहोरी जनराका छन् । लोकदोहोरीलाई समावेशी तुल्याउन यसपटक चर्चित लोकदोहोरी गायक खेम सेन्चुरी कोचको रुपमा छन् । सेन्चुरीका साथै यसपटक राजु लामा, उदय सोताङ र मेलिना राई कोचको रुपमा छन् ।

भ्युअर्ससिप बढाउन भ्वाइसले विभिन्न फिल्म हल, मल र भिडभाड हुने ठाउँमा पनि कुर्सी लगेर दर्शकसँग निकट हुन चाहेको छ । दर्शकलाई उक्त कुर्सीमा राखेर कुर्सी घुमाइको अनुभव दिलाउने योजना छ । अर्को सातादेखि ‘फ्ल्यासमब’ पनि गर्ने हिमालय टिभीको तयारी रहेको प्रबन्ध निर्देशक श्याम कँडेलले जनाए ।

– यस समाचारको श्रोत : Online Khabar हो ।