भेटेरिनरी अस्पताल सर्लाहीका तत्कालीन प्रमुखसहित ६ जनाविरुद्ध भ्रष्टाचार मुद्दा
१२ चैत, काठमाडौं । भेटेरिनरी अस्पताल तथा पशुसेवा विज्ञ केन्द्र सर्लाहीका तत्कालीन निमित्त कार्यालय प्रमुख डा. सुनिलकुमार यादवसहित ६ जनाविरुद्ध भ्रष्टाचार मुद्दा दायर भएको छ ।
कृषि सेड निर्माणका क्रममा भएको कामभन्दा बढीको मूल्यांकन गराएको भन्दै अख्तियार दुरुपयोग अनुसन्धान आयोगले सोमबार उनीहरूविरुद्ध विशेष अदालतमा मुद्दा दर्ता गरेको हो ।
अख्तियारले अस्पतालका तत्कालीन योजना शाखा प्रमुख सुरेन्द्र महतो कोइरी र सर्लाहीको चक्रघट्टा गाउँपालिका वडा नं ९ का तत्कालीन वडाध्यक्ष राम ईश्वर ठाकुर लोहारलाई पनि प्रतिवादी बनाएको छ ।
त्यस्तै आम्रपाली बहुमुखी सहकारी संस्थाका अध्यक्ष मृगेन्द्रप्रसाद यादव, उपाध्यक्ष जयनारायण राय र व्यवस्थापक जय नन्दन राय यादवविरुद्ध पनि मुद्दा दायर गरिएको छ ।
उनीहरूले कृषि सेड निर्माणका क्रममा फिल्डमाभन्दा बढी काम भएको विवरण पेस गरी ९ लाख ७७ हजार रुपैयाँ आम्रपाली सहकारीलाई गैरकानुनी लाभ पुर्याएको अख्तियारले बताएको छ ।
– यस समाचारको श्रोत : Online Khabar हो ।