मिस इन्टरनेसनलमा भाग लिन जापान उडिन् करुणा
काठमाडौं । मिस इन्टरनेसनल प्रतियोगितामा सहभागी हुन मिस नेपाल इन्टरनेसनल करुणा रावत शुक्रबार जापानतर्फ प्रस्थान गरेकी छन् । त्रिभुवन अन्तर्राष्ट्रिय विमानस्थलमा उनलाई द हिडन ट्रेजरका पदाधिकारीले राष्ट्रिय झण्डासहित बिदाइ गरे ।
करुणाले टोकियोमा अक्टोबर २९ देखि नोभेम्बर १३ सम्म हुने प्रतियोगितामा नेपालको प्रतिनिधित्व गर्नेछिन् । विमानस्थलमा सञ्चारकर्मीसँग कुरा गर्दै उनले यसपटक मिस इन्टरनेसनलमा मानसिक स्वास्थ्य सचेतना र दिगोपनको थिम तय रहेको जनाइन् । उनले आफूले सोहीअनुसार त्यहाँ प्रस्तुति दिने बताइन् ।
‘मैले यसअघि नर्चरिङ माइन्ड नामक मानसिक स्वास्थ्य सचेतनाबारेको अभियान चलाउँदै आएकी थिएँ’ करुणाले भनिन्, ‘यसपटक राष्ट्रसंघको सहस्राब्दी विकास लक्ष्यका दुई गोल राम्रो स्वास्थ्य र कल्याणबारेको प्रोजेक्ट प्रस्तुत गर्नेछु ।’
मिस इन्टरनेसनलको लक्ष्य सांस्कृतिक विविधतालाई प्रवर्द्धन गर्नु रहेको भन्दै उनले यसपटक नेसनल कस्ट्युम परेड हुने र यसका लागि तयारी गरेको बताइन् ।
मिस इन्टरनेसनलको ६२ औं संस्करण टोकियोमा डोम सिटी हलमा हुनेछ । यस वर्ष ७३ सुन्दरी उपाधिका लागि भिड्दैछन् । विजेतालाई गत वर्षकी क्राउन होल्डर तथा भेनेजुएलन सुन्दरी एन्ड्री रुबियोले ताज लगाइदिनेछिन् ।
मिस नेपाल अर्थ सुमना केसी चाहिं फिलिपिन्सको मनिलामा भइरहेको मिस अर्थ प्रतियोगितामा व्यस्त छिन् ।
– यस समाचारको श्रोत : Online Khabar हो ।