योगेन्द्रले एसियाली कुराश च्याम्पियनसिपमा प्रतिस्पर्धा गर्ने
२३ जेठ, काठमाडौं । नेपालका योगेन्द्र विष्टले १३ औं एसियाली कुराश च्याम्पियनसिपमा प्रतिस्पर्धा गर्ने भएका छन् । इरानको तेहरानमा यही जुन ६ देखि १० तारिखसम्म हुने प्रतियोगितामा विष्टले पुरुष ८१ केजीमुनि तौलसमूहमा प्रतिस्पर्धा गर्नेछन् ।
एसियाली प्रतियोगितामा योगेन्द्रको यो पहिलो सहभागिता हो । योगेन्द्रले भारतको केरलामा गत अप्रिलमा भएको प्रथम दक्षिण एसियाली कुराँश प्रतियोगिताका स्वर्ण जितेका थिए ।
योगेन्द्रसंगै मनोज आचार्य र नेपाल कुराँश संघका कार्यवाहक अध्यक्ष जीवन राई पनि इरान जाँदै छन् । मनोज प्रशिक्षक सेमिनार तथा जीवन एसियाली कुराँशको कोंग्रेसमा सहभागी हुने छन् । दुवै कार्यक्रम प्रतियोगिताकै दौरान हुनेछ । टोली बिहीबार इरान प्रस्थान गर्ने छ ।
टोलीलाई राष्ट्रिय खेलकुद परिषद्का सदस्य सचिव टंकलाल घिसिङले बुधबार एक कार्यक्रमबीच बिदाइ गरे । सो अवसरमा सदस्य सचिव घिसिङले खेलको पहिलो अनुहार खेलाडी हुन् भन्दै कुराँश संघलाई खेलको विस्तार गरी खेलाडी उत्पादनमा जोड दिनु पर्ने बताए ।
– यस समाचारको श्रोत : Online Khabar हो ।