यो साता फाइनान्स र बैंकमा आकर्षण, ८ कम्पनीको मूल्य बढ्यो धेरै
२ कात्तिक, काठमाडौं । दशैंपछिको यो साता सेयर बजार २.८८ प्रतिशत बढेको छ ।
दशैंअघि गत साता २६६८ अंकमा बन्द भएको बजार यो साता ७७ अंक बढ्दै २७४५ अंकमा पुगेको हो । दशैं विदाका कारण यो साता ३ दिन मात्रै कारोबार भयो । तीनै दिन बजार बढ्यो । मंगलबार ३१.४८, बुधबार ४३.२२ र बिहीबार २.४७ अंकले बढ्यो ।
बजार बढ्दा कारोबार रकम पनि बढ्दै गएको छ । मंगलबार ३ अर्ब ६ करोडको कारोबार भएकोमा बुधबार ५ अर्ब ६६ करोड र बिहीबार ७ अर्ब १९ करोडको भयो । साउन ३० गते ३००० अंकसम्म पुगेको बजार असोज १३ गते २४६४ अंकसम्म झर्यो । त्यसयता बजार पुनः उकालो गतिमा देखिएको छ ।
घट्दो ब्याजदर र पर्याप्त लगानीयोग्य रकमले बजारलाई साथ दिइरहेको छ । बजारको पूँजीकरण ४३ खर्ब ६५ अर्ब रुपैयाँ बराबर पुगेको छ । साउन ३० गते यो हालसम्मकै उच्च ४७ खर्ब ६५ अर्ब रुपैयाँसम्म पुगेको थियो ।
फाइनान्समा उच्च वृद्धि, बैंकिङमा उत्साह
यो साता बजारमा सबै सेक्टरका सूचक बढेका छन् । फाइनान्स सबैभन्दा धेरै ६ प्रतिशत बढ्यो । पछिल्लो समय फाइनान्समा बढी उतारचढाव देखिँदै आएको छ ।
भदौ ६ गते हालसम्मकै उच्चतम विन्दु ३९७५ अंकमा पुगेको यो समूह असोज १३ गते २७१२ अंकसम्म झ¥यो । अर्थात् डेढ महिनाकै अन्तरमा फाइनान्स समूह ३१.७७ प्रतिशतले घटेको थियो । असोज १३ यता यो समूह २६ प्रतिशत बढेको छ । बजारमा कुल १५ फाइनान्स कम्पनी सूचीकृत छन् । ‘लोक्याप’का कारण देखिएको कमजोर आपूर्तिले यस सेक्टरलाई बढाएको हो ।
बैंकिङ अरुको तुलनामा न्यून उतारचढाव हुने सेक्टर हो । ‘हाइक्याप’ कम्पनी भएकाले यस सेक्टरको उतारचढाव न्यून हुने गर्छ । यद्यपि यो साता सबैभन्दा धेरै बढ्ने दोस्रो सेक्टरमा यहीं समूह रह्यो । यो साता बैंकिङ सेक्टर ४ प्रतिशत बढ्यो । भदौ ६ गते १७१२ अंकमा रहेको यो समूह असोज १३ गते १६.६ प्रतिशतसम्म घटेर १४२७ अंकमा झर्यो । असोज १३ यता यो समूह १२.६ प्रतिशत बढेको छ ।
उच्च कारोबार भएका कम्पनी
रकमका आधारमा यो साता उच्च कारोबार हुने कम्पनीमा गुडविल फाइनान्स अगाडि रह्यो । सो कम्पनीको ४९ करोड रुपैयाँ बराबरको कारोबार भयो ।
त्यस्तै दोस्रोमा रहेको कुमारी बैंकको ४७ करोड ४१ लाख रुपैयाँ बराबरको भयो । हिमालयन रिइन्स्योरेन्स, नेपाल फाइनान्स, साहस ऊर्जा, ङादी ग्रुप, शिवम् सिमेन्ट, प्रभु बैंक, सीईडीबी हाइड्रोपावर र एसबीआई बैंक क्रमशः अगाडि रहे ।
सेयर संख्याका आधारमा धेरै कारोबार हुने कम्पनीमा कुमारी बैंक, प्रभु बैंक, अपी पावर, निफ्रा, नेपाल इन्भेस्टमेन्ट मेगा बैंक, सिंगटी हाइड्रो इनर्जी, साहस ऊर्जा, ग्लोबल आईएमई बैंक, अरुणभ्याली हाइड्रोपावर र दोलखा हाइड्रोपावर क्रमशः अगाडि रहे ।
कारोबार संख्याका आधारमा हिमालयन रिइन्स्योरेन्स, कुमारी बैंक, निफ्रा, अपी पावर, साहस ऊर्जा, प्रभु बैंक, माथिल्लो तामाकोशी, गुडविल फाइनान्स, ग्लोबल आईएमई बैंक र सोनापुर सिमेन्ट क्रमशः अगाडि रहे ।
– यस समाचारको श्रोत : Online Khabar हो ।