यो साता २२० अंक बढ्यो सेयर बजार, अर्को साता होला करेक्सन ?

४ साउन, काठमाडौं । यो साता सेयर बजार २२० अंक अर्थात् ९.९८ प्रतिशत बढेको छ । गत साता २२०४ अंकमा रहेको बजार यो साता २४२४ अंकमा पुग्यो । नेप्सेको यो अंक २७ महिनायताकै उच्च हो । नेप्से परिसूचक मात्रै बढेको छैन, कारोबार रकमले त बुल यात्राकै संकेत गरेको छ ।

बिहीबार एकै दिन १५ अर्ब ५४ करोडको धितोत्रप कारोबार भयो । यो कारोबार रकम भदौ २०७८ यताकै उच्च हो । २०७८ भदौमा बजारले ३१९८ अंकको उच्चतम रेकर्ड पनि बनाएको थियो । २०७८ भदौयता यति धेरै रकमको कारोबार नै भएको थिएन ।

बजारमा ठूलो रकम भित्रिएकै कारण खास करेक्सन हुन सकेको छैन । आइतबार ५२.९७ अंक बढेको बजार सोमबार जम्मा १७.१८ अंक मात्रै घट्यो । मंगलबार ७०.१८, बुधबार ५४.०४ र बिहीबार ५९.६८ अंक बढ्यो ।

कारोबार रकमले नै परिसूचकलाई धकेल्दै लगेको देखिन्छ । आइतबार ७ अर्ब ६२ करोडको कारोबार भएकोमा सोमबार ८ अर्ब ७३ करोड, मंगलबार ९ अर्ब १३ करोड, बुधबार १२ अर्ब ५ करोड र बिहीबार १५ अर्ब ५४ करोडको कारोबार भयो ।

आक्रामक बन्यो बैंकिङ
यो साता बैंकिङ समूहको सूचक सबैभन्दा धेरै १४ प्रतिशत बढ्यो । गत साता बैंकिङ सूचक ५.७ प्रतिशत बढेको थियो । दुई सातादेखि नै बैंकिङ समूह बजारमा आक्रामक भएपछि समग्र परिसूचक नेप्से दरले बढ्न पुगेको हो ।

वाणिज्य बैंकहरुको बजार पूँजीकरण २६ प्रतिशत रहेकाले यो समूहको सूचकले बजारलाई बढी असर पार्दछ । बैंकिङ समूहमा १९ वटा वाणिज्य बैंक सूचीकृत छन् । सस्ता वाणिज्य बैंकको मूल्य उच्च दरमा बढेको छ ।

यो साता कुमारी बैंकको २१, प्रभु बैंकको २०, प्राइम कमर्सियल बैंकको २०, सिटिजन्स बैंकको १७ तथा नेपाल इन्भेस्टमेन्ट मेगाको १६ प्रतिशत मूल्य बढेको छ । बैंकिङ समूहमा ‘हाई क्याप’ कम्पनी छन् । यो साता हाई क्याप कम्पनीको मूल्य बढ्नुले समग्र बजारलाई सकारात्मक लयमा डोहो¥याएको छ । बैंकिङ समूहमा २ कम्पनीको मूल्य मात्रै ६ सयभन्दा माथि छ । स्टान्डर्ड चार्टडको मूल्य प्रतिकित्ता ६६० एभरेस्टको ६१० रुपैयाँ छ ।

बैंकिङपछि यो साता व्यापार समूह १२.७७ प्रतिशत बढ्यो । यो समूहमा भने जम्मा २ कम्पनी मात्रै छन्– साल्ट ट्रेडिङ कर्पोरेसन र विशाल बजार कम्पनी । यी दुई कम्पनीको मूल्य बढ्दा समग्र समूह बढ्छ ।

यो साता मूल्य घट्नेमा ऋणपत्रहरु अगाडि रहे । कुमारी बैंकको केबीएलडी ८९, एनआईसी एसिया बैंकको एनआईसीएडी ८२८३, एनआईबीडी ९०, जीडब्लुएफडी ८३ ऋणपत्रको मूल्य १० प्रतिशतभन्दा धेरै घट्यो ।

कस्तो रहला आगामी साताको बजार ?
नेपाल राष्ट्र बैंकले आउने साता मात्रै मौद्रिक नीति ल्याउने भएको छ । शुक्रबार ल्याउने तयारी गरिएपनि प्रधानमन्त्री केपीशर्मा ओलीका आर्थिक सल्लाहकार डा.युवराज खतिवडासँग परामर्श गर्नुपर्ने भएपछि मौद्रिक नीति ल्याउने अवधि सरेको छ । विगतमा अर्थमन्त्री भएकै बेला खतिवडा सेयर बजारप्रति अनुदार रहने गरेको बुझाइ लगानीकर्तामा छ ।

यसले गर्दा आगामी साता सुरुका केही दिन बजार करेक्सन हुन सक्नेछ । त्यसमाथि बजार करेक्सनविना धेरै नै बढेकाले नाफा बुक गर्नेहरू पनि बढ्ने भएकाले आगामी साता करेक्सनको सम्भावना बलियो बनेको छ । बीचमै मौद्रिक नीति सार्वजनिक भएमा भने मौद्रिक नीतिका विषयले बजारलाई आगामी साता बढी प्रभाव पार्ने छ ।

मौद्रिक नीतिमार्फत सेयर धितो कर्जामा व्यक्तिगत कर्जा सीमा १५ करोड तथा संस्थागतलाई २० करोडको सीमालाई खुकुलो बनाउन सक्ने लगानीकर्ताको अनुमान छ । यदि यस व्यवस्थालाई कुनै सम्बोधन नगर्ने हो भने बजार केही दिन प्रभावित हुन सक्नेछ ।

त्यस्तै मौद्रिक नीतिमार्फत ५० लाख माथिको सेयर धितो कर्जाको जोखिम भार १२५ लाई घटाउँदा पनि बजारमा सकारात्मक माहोल बन्ने छ । तर मौद्रिक नीतिले यी कुनै विषलाई चासो दिएन भने बजारमा केही ठूलै करेक्सन आउन सक्नेछ ।

– यस समाचारको श्रोत : Online Khabar हो ।