सडनडेथमा जित निकाल्दै एनआरटी शहीद स्मृति गोल्डकपको उपाधि नजिक
२३ माघ, हेटौंडा । न्यूरोड टिम एनआरटी हेटौंडामा जारी छैठौं स्थानीय तह शहीद स्मृति मकवानपुर गोल्डकपको फाइनलमा पुगेको छ ।
हेटौंडा–६, स्थित गौरीटार रंगशालामा भएको खेलमा एनआरटी (न्यूरोड टिम) क्लबले राजारानी (रारा) क्लब धनकुटालाई सडनडेथमा हराउँदै फाइनलमा पुगेको हो ।
निर्धारित समय गोलरहित बराबरी खेलेका एनआरटी र राराको खेल टाइब्रेकरमा धकेलिएको थियो । टाइब्रेकरमा पनि १२ औं प्रहारमा एनआरटी विजयी भएको हो ।
सडनडेथको ९ औं प्रहारमा राराका प्रवेश दनुवारको प्रहार क्रस बार नजिकैबाट आकाशिँदा एनआरटीका माइकल गरबुजाको प्रहारलाई विपक्षी गोलरक्षक दिप कार्कीले उत्कृष्ट बचाउ गरे ।
१० औं प्रहारमा राराका सुनिल खड्का र एनआरटीका रन्दिप पौडेलको प्रहार गोल भयो । राराका लागि ११ औं पटकमा शिशिर लेखीको प्रहार विपक्षी गोलरक्षक प्रिसोले रोके ।
मोहित गुरुङले सडनडेथको १२ औं प्रहारमा गोल गर्दै एनआरटीलाई फाइनलमा पुर्याए । खेलको म्यान अफ दी म्याच एनआरटीका गोलरक्षक प्रिसो भए ।
जिल्ला फुटबल संघ मकवानपुरको आयोजनामा भएको गोल्डकपको बिजेताले १५ लाख रुपैयाँ, उपविजेताले १० लाख र सर्वोत्कृष्ट खेलाडीले बुलेट मोटरसाइकल पाउनेछन् ।
भोलि बिहीबार दोस्रो सेमिफाइनल खेल बागमती युवा क्लब सर्लाही र विभागीय टोली एपीएफ बीच हुने छ ।
– यस समाचारको श्रोत : Online Khabar हो ।