सूर्य नेपाल प्रिमियर गल्फको तेस्रो दिन सुवास शीर्ष स्थानमा

६ असार, काठमाडौं । डिफेन्डिङ च्याम्पियन सुवास तामाङले ५ अन्डर ६७ को स्कोर दर्ज गर्दा समग्रमा १२ अन्डर २ सय ४ सहित सूर्य नेपाल प्रिमियर गल्फ च्याम्पियनसिपको तेस्रो दिन शीर्ष स्थानमा उक्लन सफल भएका छन् ।

सुवासले दोस्रो दिनका संयुक्त लिडर भुवन नगरकोटी र दिनेश प्रजापतिलाई अन्तिम १८ होलको खेल बाँकी रहँदा एक स्ट्रोकले पछि पारे । योसँगै उपाधि होड निकै प्रतिस्पर्धात्मक र रोमाञ्चक बनेको छ ।

दिनेश र भुवनले समग्रमा ११ अन्डर २ सय ५ स्कोर गरे । उनीहरू दुवै आज १ अन्डर ७१ खेल्दै संयुक्त रूपमा दोस्रो स्थानमा झरे ।

एमेच्योर सदभाव आचार्य र धरानका प्रो निरज तामाङ समग्रमा ९ अन्डर २ सय ७ स्कोरसहित संयुक्त रूपमा चौथो स्थान बाँडे । दुवैले तेस्रो दिनको खेल २ अन्डर ७० मा पूरा गरे ।

आज १ अन्डर ७१ सहित समग्रमा ६ अन्डर २ सय १० को स्कोरमा तोरण विक्रम शाही छैठौं स्थानमा छन् । एमेच्योर विजय श्रेष्ठ आइन्हाउस ५ अन्डर २ सय ११ को स्कोरमा सातौं, ४ अन्डर २ सय १२ सहित जयराम श्रेष्ठ आठौं र १ अन्डर २ सय १५ सहित एमेच्योर सुमन परियार नवौं स्थानमा रहे । विजय र जयरामले आज इभन पार ७२ तथा सुमनले ३ ओभर ७५ को स्कोर कार्ड बनाए ।

समग्रमा इभन पार २ सय १६ को स्कोरमा एमेच्योरद्वय राहुल विश्वकर्मा र तेन्जिङ पाल्देन तथा प्रो सञ्जय लामाले संयुक्त रुपमा दशौं स्थान बाँडे । राहुलले ३–अन्डर ६९, तेन्जिङले १–अन्डर ७१ र सञ्जयले ४ ओभर ७६ मा दिनको खेल सकाए ।

दोस्रो दिन संयुक्त रुपमा तेस्रो स्थानमा रहेका सुवासले शीर्ष स्थानमा उक्लने क्रममा फ्रन्टनाइन २ अन्डर ३४ मा पूरा गरे । चौथो होलमा एक सट खेर फाले भने तेस्रो, सातौं र नवौं होलमा बर्डी प्रहार गरे ।

यसपछि ५ पारको १२औं होलमा इगलको सफलता प्राप्त गरे भने लगतै १३औं होलमा एक सट बचाए । ब्याक नाइन ३ अन्डर ३३ मा सकाए । एमेच्योर गल्फर हुँदा पाँच प्रतियोगिता जितेका सुवास प्रो बनेपछि पहिलो उपाधि जित्ने दाउमा रहेका छन् ।

दिनेशले फ्रन्ट नाइन ३ अन्डर ३३ मा सकाउने क्रममा पहिलो, तेस्रो र सातौं होलमा बर्डी प्रहार गरे । यसपछि ११औं होलमा पनि एक सट बचाए । तर १२औं होलको डबल बोगी र १५औं होलको बोगीले ब्याक नाइन २ ओभर ३८ मा सकाउन बाध्य भए ।

भुवनले पनि दिनेशले जस्तै फ्रन्ट नाइन ३ अन्डर ३३ मा र ब्याक नाइन २ ओभर ३८ मा पूरा गरे । सुरुवात राम्रो गर्ने क्रममा दोस्रो, तेस्रो, पाँचौ र सातौं होलमा चार बर्डी प्रहार गरे । आठौं होलमा एक सट खेर फाले ।

यसपछि १४औं होलमा बिर्सनलायक प्रदर्शन गरे । भुवनले ४ पारको उक्त होलमा दुई पटक आउट अफ बाउन्ड्स (ओबी) प्रहार गर्दा चार सट खेर फाले । तर १७औं र १८औं होलको बर्डीले उनलाई केही राहत मिल्यो ।

एमेच्योर सद्भावले फ्रन्ट नाइन र ब्याक नाइन दुवै १ अन्डर ३५ मा सकाए । उनले तेस्रो, चौथो र ११औं होलमा बर्डी प्रहार गर्दा छैठौं होलमा बोगी खेपे ।

निरजले दोस्रो र आठौं होलको बर्डीले फ्रन्ट नाइन २ अन्डर ३४ मा सकाए । यसपछि ११औं होलको बोगीविरूद्ध १२औं होलको बर्डीले ब्याक नाइन इभन पार ३६ मा सकाए ।

सूर्य नेपाल गल्फ टुर २०२३–२४ अन्तर्गत सिजनको सबैभन्दा ठूलो प्रतियोगितामा कुल १५ लाख ५० हजार नगद पुरस्कार राशी रहेको छ ।

प्रतियोगिताको विजेताले २ लाख ७५ हजार नगद पुरस्कार प्राप्त गर्नेछन् । दोस्रो र तेस्रो हुनेले क्रमशः १ लाख ७५ हजार र १ लाख २२ हजार प्राप्त गर्नेछन् ।

यस्तै चौथो र पाँचौ हुनेलाई १ लाख २ हजार र ८० हजार प्रदान गरिनेछ् । सूर्य नेपाल प्रिमियर गल्फ च्याम्पियनसिपको प्रो–एम प्रतियोगिता शनिबार हुनेछ । जहाँ २५ प्रो र १०० एमेच्योर गल्फरको सहभागिता रहनेछ ।

– यस समाचारको श्रोत : Online Khabar हो ।