मखनगल्लीमा भत्कियो एकसय वर्ष भन्दा पुरानो घर
१२ असोज, काठमाडौं । काठमाडौं महानगरपालिकाको २४ नम्बर वडाको मखनगल्लीको एक सय वर्ष भन्दा पुरानो घर भत्किएको छ ।
निरन्तर वर्षाको कारण पानी चुहिएर तुँछेबहालको घर भत्किएको वडाध्यक्ष विनोद राजभण्डारीले बताए । ‘एक सय वर्ष भन्दा पुरानो घरको माटोहरु झर्न थालेको थियो, पानी छिरेपछि भत्किन सुरु गर्यो । यो घरको बाटो हुँदै जानुपर्ने ५ घरको बाटो अवरुद्ध भएको थियो’, वडाध्यक्ष राजभण्डारीले भने ।
‘घरमा मान्छे नबसेपनि यो घरमा एउटा बौद्ध विहार समेत थियो । यो मखनगल्ली कै मात्रै नभई काठमाडौं कै पुरानो घरमध्ये एक हो,’उनले भने । घर भत्किएपछि महानगर प्रहरी बलले माटो, काठ पन्छाएको छ ।
‘हिँड्नलाई खतरा नहुने गरी हामीले केही सामानहरु पन्छाएका छौं । अब घरबेटी आएपछि बाँकी भग्नावशेष भत्काउनुपर्छ’, नगर प्रहरी उपरीक्षक मनोज लामिछानेले भने ।
– यस समाचारको श्रोत : Online Khabar हो ।