अविनाशविक्रमको फिल्म ‘एलिफेन्ट्स इन द फग’ले जित्यो ७६ लाख रुपैयाँको नर्वेली ग्रान्ट
काठमाडौं । नेपाली फिल्ममेकर अविनाशविक्रम शाह आगामी फिल्म ‘एलिफेन्ट्स इन द फग’को तयारीमा छन् । निर्माण सुरु नहुँदै यो फिल्म यसअघि भेनिसको स्क्रिप्ट मार्केट र सनडान्सको स्क्रिप्ट ल्याबमा छनोट भइसकेको छ ।
यतिबेला भने यो फिल्मलाई लिएर महत्वपूर्ण खबर छ । शाहले निर्देशन गर्ने र अनुप पौडेलले निर्माण गर्न लागेको यो फिल्मले ६ लाख नर्वेजियन क्रोनर (झण्डै ७६ लाख रुपैयाँ)को सरफन्ड ग्रान्ट जितेको छ ।
‘सरफन्ड’ अर्थात् नर्वेजियन साउथ फिल्म फन्डले मंगलबार सन् २०२४ मा सहलगानीका लागि १० फिल्मको घोषणा गरिएको छ । ३३ आवेदकमध्येबाट यी १० छनोट गरिएको नर्वेजियन फिल्म इन्स्टिच्युटले जनाएको छ ।
यो फन्ड प्राप्त गर्नेमा दुई डकुमेन्ट्री, एक हाइब्रिड र सात फिक्सन फिल्म छन् । नर्वेको विदेश मामिला मन्त्रालयले ओस्लो फेस्टिभल एजेन्सीसँग मिलेर खडा गरेको कोषको रुपमा यो फन्ड रहेको छ ।
यस वर्षको सूचीमा नेपालसहित प्यालेस्टाइन, एल साल्भाडोर, क्युबा, कोलम्बिया, भारत, मोरक्को, जोर्डन, इरान र टर्की छन् ।
‘एलिफेन्ट्स इन द फग’मा नर्वेबाट भेरोना मेइर र स्टोर्म फिल्म्स सहनिर्माताको रुपमा छन् । शाह लिखित फिल्मले नेपालको एक गाउँमा बसोबास गर्ने लैंगिक अल्पसंख्यक समुदायले पहिचानका लागि गर्नुपरेको संघर्षको कथा पेश गर्छ ।
समलिंगी समुदायको नाइके मानिने पिरती आफूले मन पराएको मान्छेसँग साधारण जीवन बिताउने सपना देखिरहेकी हुन्छे । तर एक दिन अचानक समुदायको एक सदस्य गायब हुन्छे । पिरतीले आफ्नो स्वार्थ हेरेर प्रेमीसँग जीवन बिताउने कि समुदायका लागि लड्ने द्विविधाको कथा फिल्मले प्रस्तुत गर्छ ।
शाहको अघिल्लो छोटो फिल्म ‘लोरी’ले प्रसिद्ध कान्स फिल्म फेस्टिभलमा स्पेसल मेन्सन अवार्ड जितेको थियो ।
– यस समाचारको श्रोत : Online Khabar हो ।