दोस्रो विश्वयुद्धमा सहभागी नेपाली बहादुरसिंहको शालिक भारतमा अनावरण
१६ वैशाख, काठमाडौं । तत्कालीन ब्रिटिस इण्डियन आर्मी पहिलो गोर्खा राइफल्स दोस्रो बटालियनका सैनिक अधिकृत स्व. बहादुरसिंह बरालको भारतमा शालिक बनाइएको छ ।
भारतको भाग्सुस्थित गोरखनाथ मन्दिर परिसरमा बरालको अर्धकदको शालिक शनिबार अनावरण गरिएको हो । यो मन्दिर स्थापना गर्न बरालको भूमिका थियो ।
त्रिभुवन विश्वविद्यालयका प्राध्यापक डा. खगेन्दप्रसाद लुइँटेल र पूर्वसांसद् दिलकुमारी राईको उपस्थितिका बीच साहित्यकार समेत रहेका बरालको शालिक अनावरण गरिएको उनको परिवारका सदस्य पुजन बरालले बताए ।
बहादुरसिंह सुबेदार मेजर पदमा रहँदा सन् १९१४ सालमा पहिलो विश्वयुद्धमा फ्रान्सको युद्धमा सरिक भएका थिए । त्यसबेला उनी ‘मेम्बर अफ भिक्टोरियन अर्डर’ र ‘अर्डर अफ ब्रिटिस इन्डिया’बाट समेत विभुषित भएका थिए ।
सुवेदार मेजर पदबाट १९३५ सालमा सेवानिवृत्त भएपनि दोस्रो विश्वयुद्धको प्रारम्भसँगै सरकारी आह्वान अनुसार बहादुरसिंह पुनः सैनिक सेवामा प्रवेश गरेका थिए । सन् १९५२ सालसम्म फेरि काम गरेपछि उनलाई मानार्थ कप्तानको दज्यानी प्रदान गरिएको थियो ।
फर्किएर आएर उनी साहित्यकर्ममा पनि सरिक भएका थिए । २००७ सालको क्रान्तिका बेला बहादुरसिंहले बीपी कोइराला लगायत कांग्रेस शीर्ष नेतृत्वलाई आर्थिक सहयोग समेत गरेको पुजन बराल बताउँछन् ।
उनका कान्छा छोरा खड्गजीत बराल पनि २००७ सालको क्रान्तिमा जोडिएका थिए । पछि उनी नेपाल प्रहरीमा आईजीपी समेत भएका थिए । बहादुरसिंहको ३० असोज २०१९ मा निधन भएको थियो ।
– यस समाचारको श्रोत : Online Khabar हो ।