‘पुष्पा २’ को रिलिज मिति फेरि सरेको हो ?

काठमाडौं । ‘पुष्पा २’ लाई लिएर दर्शकको पर्खाइ अझै लम्बिने देखिएको छ । निर्माण कार्यमा सुस्ततापछि फिल्मको प्रदर्शन मिति पुनः सरेको भारतीय सञ्चारमाध्यमले जनाएका छन् ।

अल्लु अर्जुन स्टारर यो फिल्म ६ डिसेम्बर २०२४ बाट सरेर सन् २०२५ मा पुगेको समाचार केही पोर्टलले लेखेका छन् । यो फिल्म यसअघि १४ अगस्ट २०२४ बाट पनि सरेको थियो ।

बाँकी छायांकनका लागि समय चाहिने भन्दै निर्माताले अगस्ट मध्यलाई प्रदर्शन मितिको रुपमा तोकेका थिए । यतिबेला सामाजिक सञ्जालदेखि भारतीय मिडियामा फिल्मको प्रदर्शन पुनः धकेलिएको चर्चा भइरहेको छ ।

यसपटकको कारण चाहिं अल्लु अर्जुनको ट्रेडमार्क दाह्रीलाई लिएर भइरहेको हो । अनियमित सुटिङ तालिकाको कारण आफ्नो अल्लु अर्जुनले आफ्नो पात्रको लुकलाई परिवर्तन गरेको यस्तो भएको कोइमोइले उल्लेख गरेको छ । यसबीचमा उनी परिवारिक बिदा मनाउन विदेश गएका थिए, जसले छायांकनमा ढिलाइ भयो ।

निर्देशक सुकुमारको अमेरिका भ्रमणले पनि छायांकन ढिलो भएको जनाइएको छ । तर निर्माताले यी हल्लाबारे केही प्रतिक्रिया दिएका छैनन् । कतिपयले यी अफवाह मात्र भएको बताएका छन् । यस्तोमा निर्माताले पनि औपचारिक जानकारी दिएका छैनन् ।

‘पुष्पा २’ सन् २०२१ को तेलुगु ब्लकबस्टर फिल्म ‘पुष्पा : द राइज’को सिक्वेल समेत हो । यो फिल्मले एक मजदुरको कथा भन्छ जो रक्तचन्दन तस्करीको नाइके बन्छ । आगामी शृंखला तस्कर नाइके र प्रहरीबीचको द्वन्द्वमा आधारित छ ।

फिल्ममा अल्लु अर्जुन, रश्मिका मन्दाना र फदाह फसैलको शीर्ष भूमिका छ ।

– यस समाचारको श्रोत : Online Khabar हो ।