बच्चाले झुटो बोल्नुका ४ कारण
बच्चाहरुले कतिपय अवस्थामा झुटो बोलिरहेका हुन्छन् । जानी नजानी सबै बच्चाले कुनै न कुनै बेला झुटो बोल्छन् । कति अभिभावकले बच्चाले झुटो बालेकै कारण कुटपिटसमेत गर्छन् ।
बच्चाहरुले झुटो किन बोल्छन् त ? यसका मुख्य चार कारण छन् ।
डर
बच्चाहरुले झुटो बोल्नुको मुख्य कारण डर हो । कहिलेकाहीं साँचो बोल्दा अभिभावकले गाली गर्ने डर हुन्छ । पिट्छन् कि भन्ने डर हुन्छ र अन्य कुनै सजाय दिने डरले झुटो बोलिरहेका हुन्छन् । कतिपय अभिभावकले बच्चालाई केही गल्ती गरेमा गाली गर्ने र कुटपिट गर्ने बानी छ भने पनि बच्चाले झुटो बोल्छन् ।
उनीहरुले आफूलाई बचाउन झुटको सहारा लिने गर्छन् । स्कुलमा कलम वा कापी हराएमा पनि झुटो बोल्छन् । त्यसैले बच्चालाई धेरै डर देखाउनु हुँदैन ।
केही पाउने आशमा
प्रायजसो बच्चाले केही पाउने इच्छा भएमा पनि झुटो बोल्ने गर्छन् । किनभने बच्चाले सिधै यो चाहियो भनेर आमाबुवासँग माग गर्दा सहजै किनिदिंदैन, जसकारण उनीहरुले झुटो बोल्छन् । जस्तै, बच्चाले आफूलाई मनपर्ने कार्टुन भएको ब्याग, टिफिन बक्स, नयाँ लुगा वा जुत्ता चाहिएमा झुटो बोल्छन् । उदाहरणका लागि कतिपय बच्चाले नयाँ जुत्ता चाहिएमा जुत्ता नहराए पनि हरायो भन्ने, जुत्ता नच्यातिए पनि च्यातियो भनेर झुटो बोल्ने, जुत्ता च्यातिएकाले स्कुलमा गाली गर्यो भनेर झुटो बोल्ने गर्छन् ।
अभिभावकको झुटो बोल्ने बानी
बच्चाले झुटो बोल्न आमाबुवाको सिको गरेका पनि हुन्छन् । धेरैपटक आमाबुवाले बच्चाको अगाडि कुनै कारणले अरुसँग कुराकानी गर्दा झुटो बोलेको देखेर पनि उनीहरु सिक्नछन् । किनभने छोराछोरीको पहिलो स्कुल घर मानिन्छ भने पहिलो गुरु आमाबुवा मानिन्छ । त्यसैले बच्चाहरु धेरै समय आमाबुवासँगै हुने भएकाले उनीहरुले अभिभावकको केही बानी देखासिकी गरेका हुन्छन् । त्यसैले सकेसम्म बच्चाको अगाडि झुटो बोल्नु हुँदैन ।
अपोजिस्नल डिफिएन्ट डिसअर्डर भएमा
अपोजिस्नल डिफिएन्ट डिसअर्डर (ओडीडी) समस्या भएमा पनि बच्चाले झुटो बोल्न सक्छ । ओडीडीको समस्या भएका बच्चाले बारम्बार झुटो बोल्न सक्छन् । तर एक-दुईचोटि झुटो बोल्दैमा ओडीडी भएको हुँदैन । ६ महिनासम्म निरन्तर झुटो बोलेमा, रिस उठ्ने, चिडचिडा हुने, सामान फुटाउने, चोरी गर्ने जस्ता अन्य लक्षण देखिएमा बच्चालाई ओडीडीको समस्या हुनसक्छ । त्यस्तै अन्य मानसिक समस्याका कारणले पनि बच्चाहरु झुटो बोल्न सक्छन् ।
– यस समाचारको श्रोत : Online Khabar हो ।