लगानीकर्तामा उच्च मनोबल, ब्रोकर कार्यालयमा चहलपहल
१७ साउन, काठमाडौं । पछिल्लो साता नेप्से परिसूचक मात्रै होइन, कारोबार रकमले पनि रेकर्ड कायम गरेसँगै ब्रोकर कम्पनीको कार्यालयमा लगानीकर्ताहरुको भीडभाड बढेको छ ।
विगतमा घरमै बसेर कारोबार गरिरहेका लगानीकर्ताहरु पनि ब्रोकर कम्पनीमै ल्यापटप बोकेर पुग्छन् र माहोलअनुसार किनबेच गर्ने गर्छन् । ब्रोकर कम्पनीहरु राखेका ठूलो स्क्रिनमा कारोबारको लाइभ हेर्दै कारोबार गर्ने उनीहरुमा लामो समयपछि मनोबल निकै बढेको देखिन्छ ।
त्यति मात्रै होइन, सेयर परिसूचकमा उत्साह आउँदा डिम्याट र ब्रोकर खाता खोल्न आउने नयाँ लगानीकर्ताको संख्या पनि उल्लेख्य बढेको देखिन्छ । कोही लगानीकर्ता भने बजारबारे परामर्श गरिरहेका छन् । सबैभन्दा उच्च रकमको सेयर कारोबार गर्ने गरेको नासा सेक्युरिटिजमा बुधबार कारोबारको समयमा देखिएको दृष्य हो यो ।
तीन महिनाअघिसम्म सुनसान रहेका ब्रोकर कार्यालयमा अहिले बेग्लै रौनक देखिन्छ । नेपाल राष्ट्र बैंकले मौद्रिक नीतिमार्फत गरेको सहजीकरणले पनि धेरै लगानीकर्ता बजारप्रति सकारात्मक रहेको नासा सेक्युरिटिजका प्रवन्ध संचालक मदन पौड्याल बताउँछन् ।
‘यतिबेला नयाँ लगानीकर्ता पनि थपिएका छन्, संस्थागत लगानीकर्ता पनि थपिएका छन्’ उनले भने ‘लगानीकर्ताले एउटा कम्पनी बेचेर फेरि अर्को कम्पनी किन्ने गरेकाले अहिले पैसा बजारमै रोटेसन भइरहेको छ ।’
आएको नाफा बुक गर्ने र राम्रा कम्पनी थप्दै जाने लगानीकर्ता प्रशस्त छन्, जसले बजारको वृद्धिलाई पनि टेवा पुर्याइरहेको छ । ब्रोकर कार्यालयमा भेट भएका लगानीकर्ता सुदन पाण्डे कारोबार हुने समय दैनिक ४ घण्टा यहीं बिताउँछन् ।
बजार अब केही करेक्सन आउन सक्ने उनको अनुमान छ । ‘बजार धेरै बढिसक्यो, केही करेक्सन आउला भन्ने अनुमान छ, तर यतिबेला अनुमान मिलिरहेको छैन’ उनले भने । बुधबार बजार बन्द हुँदा पनि नेप्से परिसूचक ६४ अंक बढेर २७६० अंकमा पुगेको छ ।
केही समय बजारमा करेक्सन आए पनि छिट्टै यसअघिको उच्चतम रेकर्ड ३१९८ रेकर्ड तोडिनेमा उनी आशावादी छन् ।
तीन वर्षअघि २ भदौ २०७८ मा नेप्से परिसूचकले अहिलेसम्मकै उच्चतम ३१९८ अंक पुगेको थियो । सोहीबेला प्रवेश गरेका कतिपय लगानीकर्ताको पोर्टफोलियो अहिले पनि ऋणात्मक छ ।
१० वर्षदेखि दोस्रो बजारमा लागेका पाण्डे भने बजारबाट राम्रो नाफा लिने गरेका छन् । ‘हालै केही बढेका कम्पनीमा नाफा बुक गरेँ, अरु थपौं भने ठूलै करेक्सन आउने डर पनि छ ।’
अनलाइन प्रणाली भएकाले अहिले कतिपय लगानीकर्ताले घरबाटै कारोबार गर्छन्, तर ब्रोकर कार्यालयमा आएर साथीभाइसँग गफिँदै कारोबार गर्नु उनीसहित धेरैको बानी बनिसकेको छ । ब्रोकर कार्यालयमा बेग्लै रौनक हुने भएकाले त्यहीं पुगेर कारोबार गर्ने गरेको लगानीकर्ता बताउँछन् ।
सेयर बजारमा यतिबेला रौनकतासँगै अन्यौलता पनि छ । बजार खास करेक्सनविना बढेकाले जुनसुकै बेला ठूलो करेक्सन आउन केहीको अनुमान छ ।
अहिले बजारमा ठूलो कारोबार हुनुमा थप पैसा भित्रिनुका साथै लगानीकर्ताले आफ्नो लगानीलाई रोटेसन गरिरहेको देखिन्छ । ‘केहीमा प्रोफिट बुक गरी त्यो पनि फेरि लगानी नै गर्ने गरेको छु’ पाण्डेले भने ।
काठमाडौंमा रात्रिकालीन समयमा ट्याक्सी चलाउँदै आएका दिपेन्द्र लामिछानेले कमाएको केही आम्दानी सेयर बजारमा लगाएका छन् । दोस्रो बजार ३२ सय पुगेकै बेला उनी प्रवेश गरे । ‘केही रकम डुबाइयो, तर त्यसबाट धेरै अनुभव सिकेँ, १८०० नजिक हुँदा पुनः थप खरिद गरेँ र अहिले केही नाफा बुक गरेँ’ उनले भने ।
अहिले बजार बढ्दा उनी खुसी छन् । नाफा बुक गरेर आएको रकम केही घर खर्च जुटाए, केही रकम बजार घटेका बेला फेरि लगानी गर्ने रणनीतिमा उनी छन् । बजार बढेका बेला नाफा बुक गर्नु र घटेका बेला फेरि उठाएर धैर्य हुने लगानीकर्ताले नै गुमाउने सम्भावना कम हुने उनी बताउँछन् ।
फिल्म निर्माण क्षेत्रमा रहेका तारानाथ न्यौपानेले पनि यसअघिको कमाइलाई सेयर बजारमै लगाए । जब बजारले २८–२९ सय बनाएको थियो, सोही बेला बजार प्रवेश गरेका उनको पोर्टफोलियो अझै ऋणात्मक छ । बजार राम्रोसँग नबुझिकन प्रवेश नगर्न उनी सुझाव दिन्छन् ।
‘बजार १८ सय नजिक झरेका बेला घरपरिवारमा समेत झगडा बढ्यो’ उनले डेढ वर्षअघिको बजारलाई स्मरण गरे । फिल्मको सुटिङ नहुँदा फुर्सद हुने र सो बेला उनले सेयर बजारमा कारोबार गर्ने गरेका छन् ।
पहिले पहिले आईपीओ मात्रै भर्ने गरेकी सुनिता लिम्बु अहिले भने दोस्रो बजारमै प्रवेश गरेकी छन् । ५/६ महिनादेखि दोस्रो बजारबाट पनि केही कम्पनीका सेयर किनेको उनी बताउँछिन् ।
बजार घट्ने वा बढ्ने भनेर कसैले भन्न नसक्ने भएकाले कसैको भनाइ पत्याउन नहुनेमा उनी स्पष्ट छिन् । अरुबेला आफ्नो पसल सञ्चालन गर्ने उनले पार्ट टाइम सेयर बजारलाई दिने गरेकी छन् । ‘घर परिवारको पनि सपोर्ट छ, श्रीमानले पनि केही बचेको पैसा लगानी गर्न भनेर दिनुहुन्छ’ उनले भनिन् ।
सबै तस्बिर – आर्यन धिमाल/अनलाइनखबर
– यस समाचारको श्रोत : Online Khabar हो ।